Каспийде екі әскери қызметшіні іздеуге 250-ден астам адам жұмылдырылды

Каспий теңізінде жоғалған екі әскери қызметшіні іздеу тәулік бойы жалғасып жатыр. Операцияға 252 әскери қызметші мен қызметкер, 37 әскери сүңгуір, 14 кеме мен катер және 20-дан астам әуе кемесі жұмылдырылған.

Іздеу жұмыстары Қанат Бозымбаев басқаратын Үкіметтік комиссияның тапсырмасымен жүргізіліп жатыр. Оқиға орнындағы іздеу-құтқару жұмыстарына қорғаныс министрі Дәурен Қосанов басшылық етуде.

Жедел штаб құрамына Қорғаныс министрлігі, ҰҚК Шекара қызметі, Төтенше жағдайлар және Ішкі істер министрліктері, сондай-ақ Маңғыстау облысының жергілікті атқарушы органдарының өкілдері кірген.

Іздеу операциясына 252 адам, 34 арнайы жерүсті техникасы, 37 әскери сүңгуір, 14 кеме мен катер тартылды. Бұдан бөлек, төрт тікұшақ пен басқа да әуе техникасын қосқанда, 20-дан астам әуе кемесі жұмылдырылған.

Құтқарушылар теңіз айдынын, жағалауды және оған іргелес аумақтарды тексеріп жатыр. Әуеден бақылау да үздіксіз жүргізілуде.

Оқиғаға байланысты қылмыстық іс қозғалған. Арнайы комиссия қайғылы жағдайдың себептері мен мән-жайын анықтап жатыр. Қаза тапқандардың отбасылары мен зардап шеккен әскери қызметшілерге материалдық және психологиялық көмек көрсетілуде.

Еске салайық, 24 қыркүйекте оқу-жауынгерлік тапсырманы орындау кезінде ауа райы күрт нашарлап, жел күшейген. Соның салдарынан 17 әскери қызметшіні ашық теңіз алып кеткен. Үш әскери қызметші құтқарылды, 12-сі қаза тапты. Қалған екі әскери қызметшіні іздеу жалғасып жатыр.