Құрылтай депутаттары мен вице-министрлер мемлекеттік басқаруға қатысты ЖИ құралдарымен танысады

Елімізде мемлекеттік басқару жүйесін цифрландыру қарқын алып келеді. Бұл жолғы кезек жоғары буын басшыларына жетті. Олар ҚР Президентінің жанындағы Мемлекеттік басқару академиясының алаңында AI Governance 500 стратегиялық бағдарламасы бойынша оқытудың екінші легіне қатысады. Бұл жөнінде  Мемлекеттік қызмет істері агенттігіне сілтеме жасай отырып, QRNews хабарлайды. 

Еске салсақ, мемлекет басшысы Қасым-Жомарт Тоқаев 2026 жылды Цифрландыру және жасанды интеллект жылы деп жариялады. Соған орай биыл 8 бағыттан тұратын, 100 негізгі іс-шараны қамтитын жоспар бекітілген. Сол бойынша AI Governance 500 бағдарламасын Мемлекеттік қызмет істері агенттігі Жасанды интеллект және цифрлық даму министрлігімен бірлесіп жүзеге асырып отыр. Екі лекте бұл курсты өткендер саны екі жүзге жуықтады. Соның ішінде 99 мемлекеттік қызметші қаңтарда оқуын аяқтаса, қазіргі уақытта 93 басшы тыңдаушы болып отыр.

Бұл жолғы лекке Үкімет Аппараты бөлімшелерінің басшылары, Президент Іс басқармасының жетекшілері, Құрылтай депутаттары, салалық вице-министрлер, облыс әкімдерінің орынбасарлары, орталық және жергілікті атқарушы органдар аппараттарының басшылары, мәслихат төрағалары енді.

Ұйымдастырушылардың айтуы бойынша, AI Governance 500 бағдарламасы аясында AI Gov Cup конкурсы өтіп, 6 номинация бойынша 184 жоба қаралып, жеңімпаздарды Мемлекет басшысының өзі марапаттаған. Сонымен қатар мемлекеттік қызметшілерге арналған GPT аналогы — Ұлттық жасанды интеллект платформасы іске қосылып, онда 15 мыңнан астам пайдаланушының 500 мыңнан аса сұранысы өңделген.