Шетелге асқан заңсыз активтерді қайтару жеңілдемек

Қазақстан Республикасы Парламентінің депутаттары Қылмыстық істер бойынша өзара құқықтық көмек туралы Еуропалық конвенцияны ратификациялады. Бұл халықаралық құжат елден заңсыз шығарылған активтерді іздестіру, оларға шектеу қою және елге қайтару тетіктерін едәуір кеңейтуге мүмкіндік береді.

Қабылданған конвенция аясында Қазақстан мүлікті іздеу немесе оған арест салу туралы сұрау салуларды екі тараптың да заңнамасында қылмыстық жауапкершілік көзделген жағдайда орындайды.

Парламент депутаты Айжан Аймағанованың айтуынша, заманауи қылмыстар бір мемлекеттің аумағымен шектелмейді. Қылмыстық істер бойынша дәлелдемелер, куәлар, зардап шегушілер, күдіктілер мен заңсыз активтер әртүрлі елдерде орналасуы мүмкін. Осыған байланысты тергеу амалдарының тиімділігі шетелдік әріптестерден қажетті мәліметтерді жедел алуға және процестік әрекеттерді уақтылы жүргізуге тікелей байланысты.

Сонымен қатар құжатта шетелдік азаматтар ұсталған немесе қамауға алынған жағдайда олардың талабы бойынша консулдық мекемелерді хабарландыру тәртібі қарастырылған. Сотқа шақыру қағаздарын жіберу туралы тапсырмалар белгіленген мерзімге дейін кемінде 50 күн бұрын жолдануы тиіс. Қазақстанға келіп түсетін барлық сұрау салулар қазақ немесе орыс тілдеріне аударылған ресми сүйемелдеумен қабылданады.

Халықаралық Келісімді іске асырудағы уәкілетті орталық органдар болып мыналар бекітілді:

• Қазақстан Республикасының Жоғарғы Соты - сот өндірісіндегі қылмыстық істер бойынша құқықтық көмек көрсету сұраулары қайталанады;

• Қазақстан Республикасының Бас прокуратурасы - сотқа дейінгі тергеу және өзге де қылмыстық істер бойынша барлық сұрау салуларға жауап береді.

Депутат А. Аймағанова ратификациялау нәтижесінде Еуропа мемлекеттерімен құқықтық ынтымақтастық сапалы жаңа деңгейге көтеріліп, құқық қорғау органдарына заңсыз жолмен табылған және шетелге асырылған активтерді қайтаруға толық заңнамалық негіз жасалғанын атап өтті.