«Қазақ тілінде бір ауыз сөз айта алмау білімсіздіктің белгісіне айналды» – Тоқаев

Президент Қасым-Жомарт Тоқаев Қазақстан Халық Кеңесінің бірінші сессиясында мемлекеттік тілдің қоғамдағы орны туралы айтты. Оның сөзінше, қазақ тілінің қолданыс аясы ешқандай әкімшілік немесе саяси мәжбүрлеусіз кеңейіп, көпшіліктің тіліне айналды.

«Ана тіліміз мемлекеттік тіл ретінде сұранысқа ие, ұлттық мәдениетімізді, болмысымызды шырайлы да шұрайлы туған тіліміз арқылы көрсетеміз. Қазақ тілінде бір ауыз сөз айта алмау білімсіздіктің белгісіне айналды», – деді Тоқаев.

Президент әсіресе жастардың қазақ тілінде еркін әрі сауатты сөйлейтінін атап өтті. Оның айтуынша, мемлекеттік тіл – ұлтты ұйыстырып, мемлекеттің іргесін бекемдейтін ең маңызды фактор.

Сонымен бірге Тоқаев қазақ тілінің өрісін кеңейту басқа тілдерден бас тартуды немесе оларды шеттетуді білдірмейтінін айтты. Ол Конституцияда адамды тіліне, тегіне, ұлтына, діни көзқарасы мен нанымына байланысты кемсітуге тыйым салынғанын еске салды.

Президент әлеуметтік желіде ұлтаралық араздықты қоздыруға тырысатын адамдар да бар екенін айтты. Оның сөзінше, мұндай әрекеттерге құқық қорғау органдары мен қоғам «Заң мен тәртіп» қағидатына сай қарсы тұруы керек.