Студенттер сарайы опырылды ма: ҚазҰУ түсініктеме берді

Әлеуметтік желіде Әл-Фараби атындағы Қазақ ұлттық университетінің Ө.А.Жолдасбеков атындағы Студенттер сарайының шатыры мен ішкі жабындары опырылғаны туралы ақпарат пен суреттер тарады. ҚазҰУ баспасөз қызметі ғимаратта апат болмағанын, суреттер жоспарлы бөлшектеу жұмыстарынан кейін түсірілгенін хабарлады.

Университет мәліметінше, 23 қыркүйекке қараған түні Студенттер сарайының шатырын жоспарлы түрде бөлшектеу жұмыстары жүргізілген. Оқу үдерісіне кедергі келтірмеу және қауіпсіздікті қамтамасыз ету үшін жұмыс түнде атқарылған.

«Мердігерлер тарапынан қауіпсіздік шаралары толық сақталды. Зардап шеккендер жоқ», – делінген ҚазҰУ хабарламасында.

Қазір Студенттер сарайын қайта жаңғырту жұмыстары жүргізіліп жатыр. Университеттің мәліметінше, ғимараттың құрылысы 1985 жылы басталып, 1998 жылы аяқталған. Шамамен 30 жыл бойы нысанда күрделі жөндеу де, қайта жаңғырту да жүргізілмеген.

2023 жылы ғимараттың техникалық жағдайына жүргізілген сараптама бірқатар елеулі ақауды анықтаған. Кей темірбетон арқалықтары болмаған, бағандардың жекелеген тұстары тот басып, ішінара бұзылған және қисайған. Арқалықтар мен бағандардың жалғасқан тұстары зақымданып, кей арқалықтар иілген.

ҚазҰУ мәлімдемесінде бұл ақаулар Студенттер сарайының кезінде құрылыс нормалары мен ережелері өрескел бұзылып пайдалануға берілгенін көрсететіні айтылған. Кейбір ақауларды ішкі әрлеу жұмыстарын алып тастамай анықтау мүмкін болмаған.

Университет тарихи-мәдени маңызы бар Студенттер сарайын сақтап, қалпына келтіруге шешім қабылдаған. Қайта жаңғырту кезінде ғимараттың беріктігі мен адамдардың қауіпсіздігіне басымдық берілмек.