Нұрай Серікбай ісі бойынша апелляция қаралды: сот шешімі қандай?

Нұрай Серікбайды өлтіргені үшін өмір бойына бас бостандығынан айырылған Шерхан Аймаханға қатысты үкім өзгеріссіз қалды. Мұндай шешімді қалалық соттың апелляциялық алқасы шығарды, деп хабарлады Kazinform.

Бірінші сатыдағы сот Аймаханды некеге тұруға мәжбүрлеу, аңду және аса қатыгездікпен адам өлтіру баптары бойынша кінәлі деп таныған. Сотталушының қорғаушылары үкімге шағым түсірді.

Апелляциялық сот отырысында адвокаттар некеге тұруға мәжбүрлеу айыбы дәлелденбеді деп мәлімдеді. Олардың айтуынша, екі жастың қарым-қатынасы өзара келісімге негізделген, ал бейнежазбалар мен хат алмасу Нұрай Серікбайдың Шерхан Аймаханға тұрмысқа шығуға ниетті болғанын көрсетеді.

Қорғаушылар адам өлтіру әрекетінің «аса қатыгездікпен жасалды» деп саралануына да келіспеді. Олар тергеу мен сот жәбірленушіге ерекше азап келтіру мақсаты болғанын анықтамады деп есептейді. Сондай-ақ адвокаттар кей жарақат салынған кезде қыздың есін біліп жатқаны туралы тұжырым болжамға негізделгенін айтты.

Қорғаушы тарап Аймаханды некеге тұруға мәжбүрлеу бабы бойынша ақтап, адам өлтіруге қатысты айыпты қайта саралауды және өмір бойғы бас бостандығынан айыру жазасын өзгертуді сұрады. Адвокаттар қатты жан күйзелісі мен қажетті қорғаныс туралы уәж де келтірген.

Алайда сот-психологиялық және психиатриялық кешенді сараптама физиологиялық аффект жағдайын анықтамаған. Сарапшылар Аймахан өз әрекетінің сипатын түсініп, оны басқара алған деген қорытындыға келген.

Жәбірленуші тарап бірінші сатыдағы соттың қылмыстық жазаға қатысты үкімін өзгертпеуді сұрады. Алайда моральдық зиян өтеміне қатысты бөлігіне шағымданып, 25 млн теңге өтемді 10 млрд теңгеге дейін көбейтуді талап етті.

Істі қараған апелляциялық алқа қылмыстық жауапкершілікке қатысты үкімді өзгертуге негіз таппады. Шерхан Аймаханға кесілген өмір бойғы бас бостандығынан айыру жазасы өзгеріссіз қалды.