Алматыда ЖРВИ өршіп тұр, бірақ жаңа вирус анықталған жоқ

Әлеуметтік желілерде Алматы тұрғындарын жаппай сұлатып жатқан «жаңа белгісіз вирус» туралы тараған сыбыстарға нүкте қойылды. Санитариялық-эпидемиологиялық бақылау департаменті жүргізілген зертханалық тексерулердің нәтижесін жариялап, шаһарда ешқандай жаңа немесе белгісіз инфекцияның табылмағанын ресми түрде мәлімдеді.

Департамент басшысының орынбасары Гаухар Каткенованың айтуынша, қазіргі уақытта мегаполисте тек маусымдық үйреншікті вирустар - риновирус, парагрипп, РС-вирус және маусымдық коронавирус ғана айналымда жүр. Осыған байланысты мамандар тұрғындарды әлеуметтік желідегі фейк ақпараттарға сенбеуге шақырады.

Ресми статистикаға сәйкес, 7-13 қыркүйек аралығында қалада ЖРВИ-дің 18 877 жағдайы тіркелген. Бұл өткен аптамен салыстырғанда 8,8%-ға жоғары болғанымен, былтырғы жылдың ұқсас кезеңімен салыстырғанда 1,3%-ға төмен. Әзірге тұмау жағдайлары тіркелген жоқ. Дегенмен 2026-2027 жылдардағы эпидемиологиялық маусымда тұмаудың A (H1N1), A (H3N2) және B (Victoria) штаммдарының таралуы күтілуде.

Тұрғындарды корғау мақсатында жергілікті бюджет есебінен «Гриппол Плюс» вакцинасының 250 мың дозасы сатып алынды. Жеткізілім қыркүйектің аяғы мен қазанның басына жоспарланған. Препарат медицина қызметкерлеріне, жүкті әйелдерге, созылмалы ауруы бар азаматтарға және өзге де қауіпті топтағы тұрғындарға тегін егіледі. Егер тіркелген емханада вакцина таусылса, мекеме пациентті жақын маңдағы басқа емханаға өзі бағыттауы тиіс.

Өз кезегінде Алматы қаласы Қоғамдық денсаулық сақтау басқармасы басшысының орынбасары Ләйла Иманғалиева емханалар мен стационарлардың күшейтілген жұмыс режиміне көшкенін хабарлады. Инфекциялық ауруханаларда косымша резервтік төсек-орындар дайындалып, мектептер мен балабақшаларда «таңертеңгілік сүзгі» енгізілді. Дәрі-дәрмек пен қорғаныс құралдарының тапшылығы жоқ.