$ 445.65 € 508.71 ₽ 5.3

«Әбіл» фильмі Қазақстан атынан «Оскарға» ұсынылды

Абдрахманов Мағжан
23 қыркүйек 2026, 12:10
«Әбіл» фильмі Қазақстан атынан «Оскарға» ұсынылды Сурет авторы: фильмнің постері

Режиссер Елзат Ескендірдің «Әбіл» фильмі Қазақстан атынан 2027 жылы өтетін 99-шы «Оскар» сыйлығына ұсынылды. Картина «Үздік халықаралық толықметражды фильм» санаты бойынша бақ сынайды, деп хабарлады Қазақстан киногерлер одағы жанындағы Қазақстанның Оскар комитеті.

Фильмді Оскар комитетінің мүшелері өтінім берген картиналарды қарау қорытындысы бойынша таңдаған. Комитетке Қазақстан киногерлер одағы, Ұлттық кино өнері және ғылымдары академиясы, Қазақстан кинематографистер лигасы және Қазақстан киносыншылар қауымдастығының өкілдері кірген.

«Әбіл» фильміндегі оқиға 1993 жылы, Кеңес Одағы ыдырағаннан кейінгі Қазақстанда өрбиді. Басты кейіпкер – бүкіл ғұмырын ұжымшарда еңбек етумен өткізген шопан Әбіл. Шаруашылық таратылып, жекешелендіру басталғанда оның қалыптасқан өмірі өзгереді. Әбіл жылдар бойғы еңбегінің өтеуі ретінде өзіне тиесілі үлесті алуға тырысады.

Басты рөлді Ерлан Төлеутай сомдаған. Фильмнің сценарий авторы әрі қоюшы режиссері – Елзат Ескендір, қоюшы операторы – польшалық Йоланта Дылевска.

«Әбілдің» әлемдік тұсаукесері Пусан халықаралық кинофестивалінде өтті. Кейін фильм Азия мен Еуропадағы бірқатар халықаралық кинофестивальге қатысып, жүлде иеленді. Франциядағы Везуль Азия киносы халықаралық фестивалінде картина бас қазылар алқасының жүлдесін, киносыншылар алқасының жүлдесін және NETPAC жүлдесін алған.

Ерлан Төлеутай Бішкек және «Жібек жолы» халықаралық кинофестивальдерінде үздік ер адам рөлі үшін марапатталды. Картина Дананг пен Даккадағы халықаралық кинофестивальдерде де жүлдеге ие болған.

Фильм Мәдениет және ақпарат министрлігі мен Ұлттық киноны қолдау мемлекеттік орталығының қолдауымен Шәкен Айманов атындағы «Қазақфильм» ұлттық киностудиясының базасында түсірілген. Ол 2026 жылдың маусымында Қазақстан кинотеатрларында кең көрсетілімге шықты.

Қазақстанның фильмді ұсынуы оның «Оскарға» үміткерлердің түпкілікті тізіміне енгенін білдірмейді. «Үздік халықаралық толықметражды фильм» санатындағы келесі кезеңдерге өтетін туындыларды Америка кино өнері және ғылымдары академиясы анықтайды.

#Әбіл #Толықметражды фильм

Соңғы жаңалықтар