Brent бағасы 100 доллардан төмен түсті: мұнай неге арзандады

Әлемдік нарықта мұнай бағасы 22 қыркүйекте екі аптадағы ең төменгі деңгейге түсті. Brent маркалы мұнайдың қараша айына арналған келісімшарты 2 пайыз арзандап, баррелі 98,33 долларға дейін төмендеді, деп хабарлады Reuters.

Мұнайдың арзандауына Парсы шығанағынан жеткізілім көлемі артуы мүмкін деген болжам және АҚШ пен Иран арасындағы дипломатиялық келіссөзге қатысты үміт әсер етті. Нарықта Иран АҚШ әскери қысымды бәсеңдеткен жағдайда Ормуз бұғазын жеті күн ішінде қайта ашуға дайын екені туралы ақпарат тарады.

Иранның жоғары лауазымды өкілі Нью-Йорктегі БҰҰ Бас Ассамблеясына барған ел делегациясының АҚШ-пен дипломатиялық келіссөз жүргізуге өкілеттігі бар екенін мәлімдеген. Ормуз бұғазы арқылы бұған дейін әлемдегі мұнай мен газ жеткізілімінің шамамен бестен бірі өткен. Сондықтан бұғаздағы жағдайдың тұрақтануы нарықтағы мұнай тапшылығына қатысты алаңдаушылықты азайтуы мүмкін.

Бағаның төмендеуіне Сауд Арабиясынан мұнай тасымалының қалпына келе бастауы да ықпал етті. Saudi Aramco Ормуз бұғазы арқылы жөнелтілетін мұнай көлемін арттырған. Сонымен бірге Сауд Арабиясының Шығыс-Батыс мұнай құбыры қайта іске қосылып, Қызыл теңіз жағалауындағы Янбу порты арқылы экспортты жандандыру мүмкіндігі пайда болды.

Бір күн бұрын Brent мұнайы 3,4 пайыз арзандап, сауда қорытындысында баррелі 100,34 доллар болған еді. WTI маркалы мұнай 4,5 пайызға жуық төмендеп, 95,78 долларға түсті. Екі марканың да бағасы 9 қыркүйектен бергі ең төменгі деңгейге жеткен.

Мұнай бағасының өзгеруі Қазақстан үшін де маңызды. Елдің экспорттық және бюджет кірістерінің бір бөлігі мұнай секторына тәуелді болғандықтан, әлемдік нарықтағы бағаның ұзақ уақыт төмен болуы мұнайдан түсетін кіріске әсер етуі мүмкін.