Депутат туроператорларды қазақстандықтардың отанына оралуына кепілдік беруді міндеттеуді ұсынды

Парламентте шетелге сапарлап барып, түрлі тығырыққа тірелетін Қазақстан азаматтарының қауіпсіздігін қамтамасыз ету мәселесі көтерілді. Құрылтай депутаты Константин Петров халықаралық сапарлар мен білім беру бағдарламаларын ұйымдастырушы компанияларды қазақстандықтардың отанына аман-есен оралуына кепілдік беруді міндеттеуді ұсынды.

Оның сөзінше, бұл бастамаға АҚШ-қа Work and Travel бағдарламасымен барып, алаяқтардың кесірінен қаражатсыз және баспанасыз далада қалған 200 қазақстандық студенттің басынан өткен келеңсіз оқиға түрткі болды. Депутат елімізде жастарды шетелдегі тағылымдамалар мен білім беру бағдарламаларына жіберетін делдалдық агенттіктердің қызметі тиісті деңгейде лицензияланбайтынын және мемлекет тарапынан бақыланбайтынын атап өтті.

«Еуропалық Одақ заңнамасы компания дағдарысқа ұшыраған немесе банкрот болған жағдайда азаматтарды үйге жедел қайтаруды және олардың шығындарын толық өтеуді қамтамасыз ететін міндетті кепілдіктер мен өтемақы қорларын талап етеді. Күдікті делдалдардың кесірінен отандастарымыз шет елде көмексіз қалмауы тиіс», - деді Константин Петров.

Тұрғындар мен студенттердің құқығын қорғау мақсатында депутат білім беру және туристік агенттіктерге қатысты мемлекеттік аккредиттеу жүйесін енгізуді, сондай-ақ оларды шетелдік қабылдаушы тараптармен тікелей келісімшарт жасасуға міндеттеуді ұсынды.

Депутат ұсынған негізгі шаралар:

• Келісімшартқа отырмас бұрын азаматтар компанияның заңдылығы мен сенімділігін тексере алуы үшін аккредиттелген операторлардың бірыңғай базасын жүргізу;

• Халықаралық сапар ұйымдастырушыларын компания банкрот болған немесе алаяқтық әрекеттер орын алған жағдайда азаматтарды эвакуациялау шығындарын өтейтін арнайы резервтік қорлар мен сақтандыру өнімдерін қалыптастыруға міндеттеу.