Өзбекстанда балаларды діни тәрбие процесіне заңсыз тартқандарға айыппұл салынбақ

Өзбекстанда Заң шығару палатасының отырысында «Балалардың құқықтарын одан әрі нығайтуға байланысты кейбір заңнамалық актілерге өзгерістер мен толықтырулар енгізу туралы» заң жобасы қабылданды, деп хабарлайды Qrnews тілшісі UzNews порталына сілтеме жасап.

Заң жобасы Әкімшілік жауапкершілік туралы кодекстің 47-бабын қосымша бөлімдермен толықтырып, ата-аналар немесе олардың орнын алмастыратын адамдардың баланы діни тәрбие процесіне заңсыз тартқаны үшін әкімшілік жауапкершілік енгізуді көздейді.

Яғни, ата-аналар немесе олардың орнын алмастыратын адамдардың баланы діни тәрбие процесіне заңсыз тартқан жағдайда, 10-нан 15 АЕК-ке дейін айыппұл салынады.

Егер әкімшілік жаза қолданылғаннан кейін бір жыл ішінде осы құқық бұзушылық қайталанса, 15-тен 25 АЕК-ке дейін айыппұл салынады немесе 15 тәулікке дейін әкімшілік қамауға алынады.

Баланы тіркелмеген немесе лицензиясы жоқ ұйымдарға немесе арнайы діни білімі жоқ және Өзбекстандағы діни ұйымдарды басқарудың орталық органының рұқсатынсыз діни оқыту жүргізетін адамдарға діни білім алу үшін беруге тыйым салынады.

«Аталған заң жобасының қабылдануы балалардың білім алу құқығын қорғауға және оларды діни экстремизм, сепаратизм және фанатизм идеяларының құрбаны болудан сақтауға қызмет етеді», – деп атап өтті депутаттар.