Қырғызстанда жемқор шенеуніктердің туыстарына мемқызметте жұмыс істеуге тыйым салынады

Енді жемқорлар түрмеде отыратын болады, ал олардың жақын туыстарына мемлекеттік қызметте жұмыс істеуге тыйым салынады. Бұл туралы Ұлттық қауіпсіздік мемлекеттік комитетінің (ҰҚМК) басшысы Камчыбек Ташиев мәлімдеді, деп хабарлады economist.kg.

ҰҚМК төрағасы елдегі жемқорлық деңгейінің төмендегеніне қарамастан, мемлекеттік құрылымдарда бұл мәселе әлі де бар екенін атап өтті. Ол жемқорлық қылмыстары үшін ұсталғандардың кейбірі қайтадан бостандыққа шығатынын, бұл құқық қорғау органдарының «шаршауына» әкелетінін айтты.

«Біз жемқорларды ұстап, қамаймыз, бірақ олар қайтадан бостандыққа шығады. Шынымды айтсам, біз осылай күресуден шаршадық», – деді ол.

Осы жағдайға байланысты ҰҚМК заң жобасын әзірледі, оған сәйкес жемқорларға өмір бойы мемлекеттік мекемелерде жұмыс істеуге тыйым салынады.

«Қазір жемқорлар айыппұлмен ғана құтылады, ал 1-2 жылдан кейін қайтадан мемлекеттік қызметке оралып, заңсыз әрекеттерін жалғастырады. Алайда енді айыппұлдардың орнына нақты түрмеге жабу шарасы қолданылады», — деді Камчыбек Ташиев.

Ол жемқорлардың туыстары, оның ішінде балалары мен бауырлары мемлекеттік қызметке қабылданбауы керектігін баса айтты.

«Кері жағдайда жемқорлық жалғаса береді. Енді ешбір жемқор түрмеден қашып құтыла алмайды, және шартты түрде мерзімінен бұрын босату оларға қолданылмайды. Жемқор — мемлекеттің бірінші жауы», — деп қорытындылады ҰҚМК төрағасы.