Көру қабілетін қайтарады: Илон Масктің зағиптерге арналған имплантаты мақұлданды

Масктің Neuralink компаниясы шығарған көру қабілетін қалпына келтіретін «Blindsight» импланты FDA тарапынан мақұлданды. Бұл туралы Масктің өзі Х платформасында хабарлады.

FDA «Blindsight» имплантына "серпінді құрылғы" мәртебесін берді. FDA-ның "серпінді құрылғы" мәртебесі өмірге қауіп төндіретін ауруларды емдеуге немесе диагностикалауға арналған кейбір медициналық құрылғыға беріледі. Бұл мәртебе әзірлену сатысындағы құрылғыларды дамытуды және қарастыруды жылдамдатуды көздейді.

"Blindsight екі көзінен де және көру жүйкесінен айырылған адамдардың да көру қабілетін қалпына келтіруге мүмкіндік береді", – деп жазды Маск X платформасында.

Көру қабілеті біртіндеп қалпына келеді. Масктің айтуынша, уақыт өте келе табиғи көру мүмкіндіктерінен асып түседі.

Neuralink 2016 жылы Маск пен инженерлер тобының негізінде құрылып, бас сүйекке имплантацияланатын ми чипін жасап жатыр. Компания бұл құрылғы болашақта мүмкіндігі шектеулі жандарға қозғалыс пен қарым-қатынас қабілетін қалпына келтіруге, сондай-ақ көру қабілетін қалпына келтіруге көмектеседі деп үміттенеді.