ҚМДБ қоғамдық орындарда бетті тұмшалауға тыйым салатын заңға қатысты мәлімдеме жасады

Қазақстан мұсылмандары діни басқармасы (ҚМДБ) елдегі қоғамдық орындарда бетті тұтас жабатын киім киюге тыйым салуға қатысты заңнамалық өзгерістерге қатысты мәлімдеме жасады.

Діни басқарма бұл шешімнің ешқандай діни сенімге немесе жеке таңдау еркіндігіне қарсы бағытталмағанын атап өтті.

«Бұл шешім – діни шектеу емес, ең алдымен қоғамдық қауіпсіздікті қамтамасыз ету қажеттілігіне байланысты қабылданған шара. Қазіргі таңда әлемнің көптеген елдері, соның ішінде мұсылман мемлекеттері де қауіпсіздік мақсатында осындай ұстанымды қолдайды», – делінген ҚМДБ мәлімдемесінде.

Ұйым өкілдері Құран мен сүннетте әйел адамның бетін жабуы міндетті етілмегенін және бұл талап қазақ халқының дәстүрінде де болмағанын ерекше атап өтті.

Айта кетейік, 2025 жылғы 30 маусымда Мемлекет басшысы Қасым-Жомарт Тоқаев құқық қорғау қызметіне қатысты заңнамалық өзгерістерге қол қойды. Жаңа заңға сәйкес, қоғамдық орындарда бетті тұтас жабатын киім киюге тыйым салынады (бұл тыйым кейбір ерекше жағдайларға қолданылмайды).