«Қазақстан темір жолы» ұлттық компаниясының жаңа басшысы тағайындалды

«Қазақстан темір жолы» ұлттық компаниясының басқарма төрағасы болып Талғат Алдыбергенов тағайындалды. Бұл туралы компанияның баспасөз қызметі хабарлады.

Жаңа басшыны ұжымға «Самұрық-Қазына» ұлттық әл-ауқат қорының басқарма төрағасы Нұрлан Жақұпов таныстырды. Бұған дейін Талғат Сағиевич Алдыбергенов ҚТЖ басқарма төрағасының орынбасары қызметін атқарған.

Ұлттық компанияның мәліметінше, Алдыбергеновтің теміржол саласында 35 жылдан астам тәжірибесі бар. Ол Алматы теміржол көлігі инженерлері институтын «Теміржол көлігіндегі тасымалдауды ұйымдастыру және басқару» мамандығы бойынша үздік аяқтаған. Сонымен қатар Ресейдегі РАНХиГС университетінің экономика магистрі (қызыл диплом) және экономика ғылымдарының кандидаты.

Ол 2024 жылдан бері «Қазақстан темір жолы» ҰК» АҚ басқарма төрағасының орынбасары болды. Бұған дейін, 2008–2019 жылдары «Кедентранссервис» АҚ президенті, «АвтоГазАлматы» ЖШС бас директоры, «Kazakhmys Maker» ЖШС басқарма төрағасы қызметтерін атқарған. 1998–2007 жылдары Ақтөбе филиалында, «Қазтранссервис» кәсіпорнында, «ҚазМұнайГаз» сауда үйінде түрлі басшылық лауазымда жұмыс істеді.

Айта кетейік, 2021 жылдан бері ҚТЖ-ны Нұрлан Сауранбаев басқарып келді. Ол жақында ҚР Көлік министрі болып тағайындалды. Бұл лауазымнан жол саласындағы кемшіліктері үшін Тоқаевтан сөгіс алған Марат Қарабаев босатылған еді.