Израиль БҰҰ-ның Таяу Шығыс агенттігіне палестиналық босқындарға көмектесуге тыйым салды

Израиль палестиналық босқындарға көмек көрсету бойынша БҰҰ агенттігінің (БАПОР немесе UNRWA) қызметіне тыйым салды. Израиль парламенті – Кнессет бұл агенттіктің Израильде және оның бақылауындағы аймақтарда жұмыс істеуіне тыйым салатын екі заң қабылдады, деп хабарлады BBC-дің орыс қызметі.

Израиль бұған дейін де агенттікті палестиналық радикалды топтармен байланыста деп айыптаған. Израильдің барлау қызметі 7 қазанда ХАМАС-тың Израильге жасаған шабуылына БАПОР-дың кем дегенде 12 қызметкері қатысты деп мәлімдеді. Бұл шабуылда 1200-ден астам израильдік қаза тауып, шамамен 250 адам тұтқынға алынған.

БАПОР басшысы Филипп Лаззарини Кнессеттің бұл шешімін «өте қауіпті прецедент» деп атады. Оның айтуынша, бұл БҰҰ Жарғысына және халықаралық заңдарға қайшы келіп, палестиналықтардың жағдайын одан сайын ушықтырады.

БҰҰ Бас хатшысы Антониу Гуттериш БАПОР-дың баламасы жоқ екенін және агенттіктің палестиналық босқындарға көмек көрсету жүйесінің негізі екенін мәлімдеді. Бұған дейін бірнеше мемлекет Израильдің бұл қадамы гуманитарлық көмек көрсетуге кедергі келтіруі мүмкін деп алаңдаушылық білдірген еді. АҚШ-тың Мемлекеттік департаменті де агенттіктің жұмысын тоқтату «терең алаңдаушылық тудырады» деп атап өтті, өйткені БАПОР Газада гуманитарлық көмек таратудың маңызды рөлін атқарады.

Израиль БАПОР қызметкерлерінің арасында ХАМАС-тың шабуылына қатысы бар адамдар бар екенін айтып, агенттікке айып тақты. Осы айыптауларға жауап ретінде агенттік ішкі тергеу бастаған еді, сол кезде бірқатар халықаралық донорлар БАПОР-ға қаржылай көмекті уақытша тоқтатты. Кейін агенттік донорлардың қаражатын қайтадан ала бастады.

Тамыз айында БАПОР ХАМАС шабуылына қатысы бар болуы мүмкін тоғыз қызметкерін жұмыстан босатты, алайда Израиль бұл шараларды жеткіліксіз деп санайды. Израильдің мәлімдеуінше, БАПОР-дың 450-ден астам қызметкері Газадағы террористік топтардың мүшесі болған.