Испаниядағы су тасқыны: Наразы жұрт королге лай лақтырды

Валенсия провинциясындағы Пайпорта қаласының тұрғындары Испания королі Филипп VI-ны батпақпен атқылады. Король аймаққа жойқын су тасқынынан зардап шеккен халықпен кездесу үшін келген болатын. Көптеген испандық билік органдары табиғи апат туралы дер кезінде ескерту жасамағанын және төтенше жағдайға кеш әрекет еткенін айтып, наразылық білдіріп жатыр, деп хабарлады BBC-дің орыс қызметі.

Филипп VI сапарға жұбайы Летиция, премьер-министр Педро Санчес және басқа да шенеуніктермен бірге шыққан, бірақ король сапарды тоқтатуға мәжбүр болды. Пайпорта қаласындағы наразы халық оларды батпақ пен басқа да заттармен атқылап, Филипп VI-нің беті мен киімін ластады. 

Корольдің Чива қаласына жоспарланған сапары да кейінге қалды.

Соңғы деректерге сәйкес, Испания тарихындағы ең жойқын су тасқыны кезінде 217 адам қайтыс болды, оның 60-тан астамы Пайпортада. Құрбандар саны артуы мүмкін, себебі іздеу жұмыстары әлі де жалғасып жатыр.

Дүйсенбіде басталған нөсер жаңбыр Валенсияда су тасқынына ұласып, көпірлерді бұзып, көліктерді ағызып, көшелерді батпақпен жапты. Көптеген қала жарықсыз, сусыз қалды.