Газа секторындағы соғыс: Израиль АҚШ-тың ұсынысын қабылдады

Израиль АҚШ-тың Газа секторында бітімге келу туралы ұсынысын қабылдады, деп мәлімдеді АҚШ мемлекеттік хатшысы Энтони Блинкен. BBC хабарлауынша, ол бұған дейін ұсыныстан бас тартқан Хамас тобын да бітімге келуге шақырған.

Блинкен дүйсенбі күні Израиль премьер-министрі Биньямин Нетаньяхумен кездескенін, ол Израиль бітімге келу туралы ұсынысты қабылдайтынын растағанын айтты.

"Енді ХАМАС та сөйтуі керек", – деді Блинкен.

Ол АҚШ-тың ешқандай шиеленістің, арандатушылықтың және мәмілені аяқтаудан қандай да бір жолмен алшақтататын әрекеттердің болмауын қамтамасыз ету үшін жұмыс істеп жатқанын айтты.

Бірнеше күн бұрын АҚШ Израиль мен ХАМАС арасындағы келіспеушіліктерді реттейтін ұсыныстарын алға тартқан. Келіссөздер процесі алты аптаға соғыс қимылдарын тоқтатуды және кепілге алынғандар мен тұтқындарды босату туралы келісімді ұсынған Джо Байденнің мамырдағы келісіміне негізделген.

Алайда ХАМАС келісімшартты қабылдамады және Нетаньяхуды келіссөздер барысында жаңа кедергілер туғызды деп айыптады. Топ мәлімдемесінде АҚШ, Мысыр және Катар делдалдарының соңғы ұсынысы "Нетаньяхудың шарттарына сәйкес келеді" делінген. ХАМАС атысты түбегейлі тоқтатуды және Израиль әскерінің Газа секторынан толықтай шығуын талап етеді.

Қазіргі келіссөздер атысты тоқтатуға және кепілге алынғандарды босатуға қол жеткізудің соңғы мүмкіндігі болуы мүмкін. Бірақ келіссөздерге Нетаньяхудың Газа-Египет шекарасы бойымен өтетін Филадельфия дәлізінде ЦАХАЛДЫ сақтау талабы кедергі болып тұр. Нетаньяхудың айтуынша, ХАМАС Филадельфия дәлізінен Израиль әскерін толығымен шығаруды талап етуін доғармайынша, ешқандай келісім болмайды.