Гарвард Бизнес Мектебі Kaspi.kz туралы екінші оқу материалын жариялады

Гарвард Бизнес Мектебі (Harvard Business School) Kaspi.kz компаниясы туралы екінші оқу материалын жариялады. Әлемдегі ең танымал бизнес мектептердің бірі саналатын бұл мектепте бизнесті кітаппен емес, нақты компаниялардың кейсімен оқытады. 

"Бұл – Kaspi.kz туралы Гарвардтың екінші кейсі, бұл кез келген компания үшін бірегей жетістік. Kaspi.kz туралы алғашқы кейс 2019 жылы жазылған, ол бойынша студенттер 4 жылдан бері білім алып келеді. Жаңа кейс «Kaspi.kz: Инновация арқылы сенім қалыптастыру» деп аталады. Ол Kaspi.kz-тегі бірегей корпоративтік мәдениетке және біздің сүйікті тұтынушыларымыздың сенімін ақтауға көмектесетін сапалы қызметтерге деген құштарлығымызға арналған. Қазір әлем бойынша бұдан да көп студенттер мен профессорлардың Қазақстанды және еліміздегі инновацияның қарқынды дамып жатқанын білуі біз үшін ерекше маңызды", – деді компания басшысы әрі негізін қалаушылардың бірі Михаил Ломтадзе.

Гарвард Бизнес Мектебі Бостонда (АҚШ) орналасқан және әлемдегі ең беделді оқу орындарының бірі саналады. Михаил Ломтадзе 2002 жылы Гарвард Бизнес Мектебінің бизнес әкімшілендіру магистрі дәрежесін алды.

2019 жылы Михаил Ломтадзе Гарвард Бизнес Мектебінің Орталық Азия, Түркия, Таяу Шығыс және Солтүстік Африка өңірі бойынша консультативтік кеңесінің мүшесі болды. Кеңестің негізгі мақсаттары – бизнес мектебіне білім беру бағдарламаларын құру, аймақтық бизнесті зерттеу және жаһандық стратегияны қалыптастыруда көмек көрсету.