Финляндия мектептерінде ноутбук орнына кітаптарды қайтара бастады

Финляндияда мектептердегі цифрландыру үдерісін қайта қарастырып, дәстүрлі оқулықтарға орала бастады. Осы күзде Рийхимяки қаласының (Хельсинкиден 70 шақырым солтүстікте орналасқан, халқы шамамен 30 мың адам) оқушылары соңғы он жылдықта мемлекет тарапынан қолдау тапқан ноутбуктер мен басқа да цифрлық құрылғыларды пайдалануға бағытталған насихаттауға қарамастан, сабаққа кітап толы рюкзактармен келіп жүр. Бұл туралы Reuters агенттігі хабарлады.

Финляндияның мемлекеттік білім беру жүйесі соңғы онжылдықтардағы жақсы нәтижелермен әлемге танылды. Көптеген мектеп 11 жастан асқан барлық оқушыға тегін ноутбук тарататын. 2018 жылдан бастап Рийхимяки қаласындағы орта мектептерде көптеген оқулықтарды қолдануды тоқтатқан болатын. Алайда мұғалімдер мен ата-аналар экрандардың балаларға әсеріне алаңдаушылық білдіре бастағаннан кейін, қаланың мектептері қайтадан дәптер мен қаламды қолданысқа енгізді.

Цифрлық құрылғыларды пайдалану балаларды алаңдатып, олардың сабаққа назарын шоғырландыруын қиындатты. Көптеген оқушы тапсырмаларды мүмкіндігінше тез орындап, содан кейін ойын ойнауға және әлеуметтік желілерде сөйлесуге көшкен. Мұғалімдер жақындаған кезде олар тек браузердегі қойындыларды ауыстырып, тапсырмаларға оралған.

Соңғы жылдары Финляндияның түкпір-түкпіріндегі балалардың оқу нәтижелері біртіндеп төмендеп келеді деп жазады агенттік. Оқушылардың өздері де цифрлық форматта оқыған кезде мектеп пәндеріне әрдайым назар аудара алмағанын мойындады. Оларға оқулықтарды қайтарғаннан кейін зейінін шоғырландыру жақсарды. Қағаз кітаптарды оқу жылдам әрі оңай екені белгілі болды.

Фин клиникалық нейропсихологы Минна Пелтопуру экран алдында өткізілетін жалпы уақытты барынша азайту керектігін алға тартады. Себебі цифрлық технологияларды шамадан тыс қолдану жасөспірімдер үшін көру қабілетінің нашарлауынан бастап алаңдаушылықтың артуына дейін физикалық және психологиялық қауіптерді туындатады. Қазіргі уақытта фин жасөспірімдері күніне орта есеппен алты сағат экран алдында өткізеді.