Димаш Құдайберген БҰҰ-ның ізгілік елшісі атанды

Әлемге танымал қазақстандық әнші Димаш Құдайберген БҰҰ құрамындағы Халықаралық көші-қон ұйымының (ХКҰ) ізгілік елшісі болып тағайындалды. Бұл туралы ұйым ресми мәлімдеді.

ХКҰ атап өткендей, Димаш өзінің шығармашылығы мен гуманитарлық қызметі арқылы түрлі дағдарыстардан зардап шеккен адамдардың мәселелеріне назар аудартып келеді.

Рәсім барысында Димаш жаңа миссияны үлкен жауапкершілік ретінде қабылдайтынын айтып, қауіпсіз көші-қон, инклюзия және өзара қолдау мәселелерін ілгерілетуді жалғастыратынын жеткізді. Сондай-ақ ол ХКҰ-ның төтенше жағдайларға ден қою және қаражат жинау бастамаларын қолдауға ниетті екенін айтты.

Әнші өз жанкүйерлеріне де алғыс білдіріп, гастрольдері кезінде өткізілген гуманитарлық жобаларды қолдағаны үшін рақмет айтты.

2024 жылы Димаш аймақтық ізгілік елшісі мәртебесіне ие болып, сол уақыттан бері миграция, адам саудасы және осал топтардың мәселелеріне қатысты бірқатар гуманитарлық кампанияға қатысып келеді. Бұған қоса, БҰҰ бас хатшысы Антониу Гутерриштің Қазақстанға сапары кезінде ол гуманитарлық бастамаларды өнер арқылы ілгерілету идеясын ұсынған.

8 желтоқсанда өткен кеңес отырысында Димаш БҰҰ мүше мемлекеттерінің делегациялары алдында S.O.S d’un terrien en détresse шығармасын орындады. ХКҰ бас директоры Эми Поуп оның гуманитарлық бастамаларға қосқан үлесін ерекше атап өтті.