"Демократия өлді": Француздар неге көтеріліске шықты? Макронның партиясы жеңілді ме?

Франциядағы парламенттік сайлаудың 1-тур қорытындысы бойынша Эммануэль Макронның партиясы жеңілді. Бұл жағдай тұрғындардың көтеріліске шығуына алып келді, деп хабарлайды Риа Новости.

Алғаш рет Бесінші республиканың сайлауы осындай қысқа мерзімде өткізіліп жатыр. 9 маусымда ел президенті парламентті таратқаннан кейін, партиялардың өз кандидаттарын ұсынуға 3 аптасы ғана болды. 

Қандай партиялар қатысып жатыр?

Қазіргі Францияның парламент сайлауында 3 партия жарысып жатыр. Олар "Ұлттық бірлестік", "Жаңа ұлттық фронт" және Макронның партиясы. Францияның ішкі істер министрлігі хабарлағандай, 1-тур қорытындысы бойынша "Ұлттық бірлестік" 34,2% дауыспен алда. Одан кейін 29,1% дауыспен "Жаңа ұлттық фронт" және 21,5% дауыспен Макронның партиясы тұр.

Партияның жеңісі нені білдіреді?

Егер "Ұлттық бірлестік" дауыс беру нәтижесі бойынша бірінші орында болса, парламенттегі 577 орынның 240-270 орындығына солар жайғасады. Екінші орындағылар 180-200 орынды алса, үшінші орын иелері 60-90 орынға қанағат етеді.

"Францияның жағдайы өзгермейді"

"Патриоттар" партиясының басшысы Флориан Филиппо "Ұлттық бірлестік" жеңген жағдайда Франция НАТО мен Еуропалық одаққа бағынатынын айтады.

"Дауыс беру нәтижесі бойынша "Ұлттық бірлестік" екінші турда да жеңіске жетсе, ол өз үкіметін тағайындайды. Ал олар сәйкесінше НАТО мен Еуропалық одаққа бағынады. Яғни елдегі қазіргі жағдай еш өзгеріссіз қала береді. Мұны олардың қазіргі бағдарламасынан-ақ аңғаруға болады", – дейді ол.

Сайлауға наразылық көтерілістері

Кеше, 30 маусымда сайлаудың алғашқы кезеңінің қорытындысы шыққан кезде Нант көшелерінде наразылық басталды. Мыңдаған адам бұл нәтижеге келіспеді. Олар қоқыс жәшігін жағып, антифашистік лозунгтармен көше бойында жүріп өткен. Бір жарым сағаттан соң ашулы көтерілісшілер жабық тұрған мейрамхананың есігі мен терезесін сындырған.
Лионда да дәл осы жағдай. Наразылық танытушылардың саны артып, дүкендерді жаппай қиратып жатыр. Actu Lyon хабарлауынша, тұрғындар "Ұлттық бірлестіктің" жеңісіне қарсы.  Қаланың ортасындағы ғимараттарда "Демократия өлді" деген жазулар ілінген. 

Қазіргі кезде "Ұлттық бірлестік" партиясының 37 мүшесі парламентке сайланды. 

Әмір Жәнібек