CNN: АҚШ билігі Иранның Трампқа қастандық жасамақ болғаны жайында ақпарат алды

АҚШ билігі соңғы апталарда Иранның АҚШ президенттігіне кандидат Дональд Трампқа қастандық жоспарлағаны туралы ақпарат алды. Бұл туралы CNN дереккөздерге сілтеме жасап хабарлады.

CNN сұхбаттастарының айтуынша, АҚШ-тың Құпия қызметі Трамптың сайлауалды штабына саясаткерге қауіп төніп тұрғанын ескерткен. Сондай-ақ Құпия қызмет саясаткер оқ жарақатын алмай тұрып-ақ, айналасындағы қауіпсіздік шараларын күшейткен. Дегенмен Трампқа оқ атқан Томас Мэттью Крукстың ирандық жоспарға қандай да бір түрде қатысы бар екені туралы ешқандай белгі жоқ.

Арнайы қызмет Трамптың сайлауалды штабына митингті ашық алаңда өткізбеуді бірнеше рет ескерткен, өйткені ашық алаңда төнетін қауіп жоғары.

Иранның Біріккен Ұлттар Ұйымындағы өкілі журналистерге "Иран Трампқа жақын арада қастандық жасады" деген айыптауларды негізсіз деп мәлімдеді.

"Иран тұрғысынан Трамп – генерал Сүлейманиді өлтіруге бұйрық бергені үшін сот алдында жауапқа тартылып, сотта жазалануы тиіс қылмыскер. Иран оны жауапқа тартудың заңды жолын таңдады", - деді ол.

Иран генералы Қасем Сүлеймани 2020 жылдың 3 қаңтарына қараған түні АҚШ-тың Ирактағы әуе шабуылынан қаза тапты. Әуе шабуылына бұйрықты сол кезде АҚШ президенті болған Дональд Трамп берген.

Иран элиталық Құдс күштерін басқарған өзінің әскери қызметкерін өлтіргені үшін кек алуға уәде берген болатын.

13 шілдеде 20 жастағы Томас Мэттью Крукс Пенсильвания штатының Батлер қаласында өткен сайлауалды науқанда АҚШ-тың экс-президенті Дональд Трампқа оқ атқан. Оқ саясаткердің құлағын жырып өткен. Атыс салдарынан 50 жастағы ер адам қаза тауып, тағы екі адам жарақат алды. Шабуылдаушыны оқиға орнында Құпия қызмет атып өлтірді.