Бектенов: «Елде жұмыс жоқ» деген сөз болмауға тиіс

Қазақстанда еңбек биржасына жарияланған бос жұмыс орындарының 30–40 пайызына дейін қызметкер табылмайды. Соның салдарынан жұмыс берушілер уақытша шетелдік жұмыс күшін тартуға мәжбүр, деп мәлімдеді Еңбек және халықты әлеуметтік қорғау министрі Асқарбек Ертаев Үкімет отырысында.

Министрдің айтуынша, жыл басынан бері Электрондық еңбек биржасында жұмыс берушілер 845 мың бос жұмыс орнын жариялаған. Оның 432 мыңы жұмысшы мамандықтарына тиесілі.

«Жалпы азаматтардың 60–70 пайызы осы портал арқылы жұмыс табады. Бірақ бос орындардың 30–40 пайызына қызметкер табылмайды. Сондықтан жұмыс берушілер уақытша шетелдік жұмыс күшін тартуға мәжбүр», – деді Ертаев.

Оның мәліметінше, Қазақстанға жыл сайын шамамен 300 мың шетелдік еңбек мигранты келеді.

Премьер-министр Олжас Бектенов министрден елде жұмыс іздеген адамға жұмыс табыла ма деп сұрады.

«Бір миллионға жуық бос орын бар ма? Яғни жұмыс істегісі келген адамға жұмыс табылады ғой?» – деді Үкімет басшысы.

Асқарбек Ертаев бұған «жұмыс істегісі келген адамға жұмыс бар» деп жауап берді.

Бектенов Қазақстанда жұмыс тоқтап қалмауы үшін мыңдаған шетелдік маманды тартуға тура келетінін айтып, бұл жағдайды халыққа түсіндіру қажет екенін атап өтті.

«Елде “жұмыс жоқ” деген сөз болмауға тиіс», – деді Премьер-министр.