"Америка тарихындағы ең нашар президент": Байден мен Трамп дебаты қалай өтті?

Бейсенбі күні Атлантада АҚШ-тың қазіргі президенті Джо Байден мен экс-президент Дональд Трамп арасында дебат өтті.

Пікірталас тікелей эфирде CNN арнасында көрермендерсіз өтті.

Джо мен Дональд аборт, иммиграция, сыртқы саясат, инфляция және т.б мәселеге тоқталды. Трамп өзінің президент кезінде, яғни 2020 жылы болған инфляцияға COVID-19 кінәлі деп таныды және ол бюджет ақшасын сол жолда жұмсағанын алға тартты. Байденге де осы тақырып қолайлы болды. Екеуі 2020 жылы болған дебатты жалғастырып кеткендей сезілді.

Қазіргі президент өзінің жас мәселесіне қатысты ақталуға тырысқанымен, бұл ісі іске аспады. Дауысы қарлығып, көп сұраққа дұрыс жауап бере алмады. Бұл жөнінде оның жақтастары Байденге соңғы күндері суық тиген деп ақтады.

Дебат алдында айтқанымыздай, Байден Трамптың қылмыстық айыптауларына тоқталды. Трамп бұған жауап ретінде Байденнің жақында сотталған ұлы Хантерді атап өтті. Содан кейін Байден Трампты әйелі жүкті болған кезде порножұлдыз Сторми Дэниэлспен жыныстық қатынасқа түсті деп айыптады. Дональд бұл мәлімдемені жоққа шығарды.

Жалпы Джоның Трампқа шабуылдары да біркелкі болды және ол бұрынғы президенттің өтірігін әшкерелеуге тырысты. Көбінесе қорғануға тырысқан Байден сайлаушыларға оның не үшін күресіп жатқаны туралы түсініксіз ой қалдырды.

Израиль мен Газа шайқасы жөнінде Трамп Палестина мемлекетін қолдайтын-қолдамайтынын айтқан жоқ, бірақ егер ол сол кезде Ақ үйді тізгіндеп отырғанда, ХАМАС-тың 7 қазанда Израильге жасаған шабуылы «ешқашан болмас еді» деп сендірді. Ал Джо болса Американың Израильмен тығыз одақтастығын айтып, АҚШ-тың «Израильді барлық қажетті қару-жарақпен және қажет болған кезде қамтамасыз етіп отырғанын» ерекше атап өтті.

Сайлауалды пікірталастың алғашқы кезеңінде Трамп "Америка - үшінші әлемнің мемлекеті сияқты болып қалған. Бұл өте ұят" десе, Байден "Бұл Америка тарихындағы ең нашар президент. Ол демократияның не екенін түсінбейді" деп жауап берген.

Миллиондаған америкалықтар өздерінің кімге дауыс берерін әлі анықтамады. Сауалнамаларға қарасақ, жергілікті халық Трампты да, Байденді де қолдамайды. Жастары 80-нің ары-берісіндегі басшыларды алмастыратын үшінші партия келуі де мүмкін деп ескертеді мамандар.

Әмір Жәнібек