АҚШ соты Google-ды монополист деп тапты

Колумбия округінің соты Google іздеу жүйелері арасындағы бәсекелестікті «тұншықтыру» үшін өзінің нарықтық күшін теріс пайдаланды деп шешті.

Сот АҚШ әділет министрлігінің «компания Apple және басқа смартфон өндірушілерімен Google-ды әдепкі іздеу жүйесі ретінде орнату туралы келісімшартқа отырып, монополияға қарсы заңнаманы бұзды» деген тұжырымымен келісті. Сонымен қатар судья компания бәсекелестерін жарнама нарығында қолайсыз жағдайға қалдырды деп шешті.

АҚШ бас прокуроры мұны америкалықтар үшін тарихи жеңіс деп атады.

«Ешбір компания қаншалықты үлкен немесе күшті болса да, заңнан жоғары емес», - деді Меррик Гарланд.

Ақ үйдің баспасөз хатшысы Карин Жан-Пьер де сот шешімін құптады.

Alphabet-тің (Google-ға иелік етеді) жаһандық мәселелер жөніндегі президенті Кент Уокер компания шешімге шағынуды жоспарлап отырғанын айтты. Компания телефонда қай іздеу жүйесін қолданатынын пайдаланушылардың өздері шешетінін бірнеше рет мәлімдеген.