Абай облысының жастары заманауи цифрлық дағдыларды трендке айналдыруда

Жасанды интеллект ғасырында қарапайым смартфонды қуатты IT құралына айналдыру мүмкін бе? Семейде өткен «SKILLUP» жобасы бұл сұраққа іс жүзінде жауап берді. Абай облысының 100-ден астам белсенді жасы үш күн ішінде цифрлық әлемнің ең соны трендтерін меңгеріп, өзінің алғашқы цифрлық өнімдерін жасап шықты.

Жобаның алғашқы күнінен-ақ қатысушылар теорияны ұмытып, бірден практикаға білек сыбана кірісті. Белгілі контент-продюсер Қуаныш Омардың шеберлік сабағында жастар смартфонмен кәсіби фото-видео түсірудің, кадр композициясын құрудың және трендтегі монтаждың қыр-сырын меңгерді. Қатысушылар оқу барысында-ақ өздерінің алғашқы видеолары мен контенттерін әзірлеп үлгерді.

Екінші күн жасанды интеллекттің шексіз мүмкіндіктеріне жол ашты. Astana Hub Семей филиалының басшысы, кәсіпкер Әнет Тұрсынжан жастарға ЖИ арқылы жансыз бейнелерге жан бітіріп, анимация жасауды және күрделі деректерді визуалды форматқа айналдыруды үйретті. Ең бастысы – қатысушылар тек цифрлық өнім жасап қана қоймай, оны нарыққа қалай сәтті шығару керектігін де талқылады.

Үшінші күн нағыз IT-серпіліске айналды. Халықаралық сарапшы Асхат Мұқановтың жетекшілігімен жастар ЖИ-ге тиімді промпт жазуды меңгеріп, қазіргі ең танымал vibe coding тәсілімен өздерінің жеке цифрлық қосымшаларын құрастырды. Идеяның туындауынан бастап, дайын өнімге дейінгі жолды үш-ақ күнде өту – жастар үшін үлкен тәжірибе болды.

«SKILLUP» – жай ғана оқыту курсы емес, бұл – болашаққа жасалған үлкен қадам. Бұл бір айлық кешенді бағдарламаның алғашқы серпіні ғана. Абай облысының жастар саясаты мәселелері басқармасының мемлекеттік әлеуметтік тапсырысы аясында «Болашақ» корпоративтік қоры ұйымдастырған жоба алдағы уақытта да жастардың цифрлық сауаттылығын арттырып, еңбек нарығында бәсекеге қабілетті болуына жол ашады.