Ақмарал Әлназарова қайтыс болғаннан кейін ағзасын донорлыққа беруге келісім берді

Қазақстанның Денсаулық сақтау министрі Ақмарал Әлназарова қайтыс болғаннан кейінгі донорлыққа келісімін тіркейтінін мәлімдеді. Бұл туралы ол Instagram парақшасында жазды.

Министр мұндай шешімді бұрын қабылдағанын, енді оны ресми түрде тіркейтінін айтты.

«Бүгін бұрыннан қабылданған шешімімді көпшілікке жария еткім келеді – қайтыс болғаннан кейінгі донорлыққа келісімімді тіркейтін боламын. Бұл туралы ашық айтуды маңызды деп санаймын. Қайтыс болғаннан кейінгі донорлық – өмір сүруге мүмкіндігі бар адамдарға көмектесудің жолы», – деді Әлназарова.

Қазақстанда 184 мыңға жуық адам таңдауын тіркеген

Министрдің мәліметінше, қазір Қазақстанда 184 мыңға жуық адам қайтыс болғаннан кейінгі донорлыққа қатысты таңдауын eGov арқылы тіркеген. Келісім берген азаматтардың саны артып келеді.

Әлназарова қайтыс болғаннан кейінгі донорлықты дамыту тек денсаулық сақтау жүйесінің міндеті емес екенін атап өтті. Оның сөзінше, бұл – қоғамдағы сенімге, ашық талқылауға және әр адамның саналы таңдауына байланысты мәселе.

Жуырда Астанада қайтыс болған донордың ағзалары кезекте тұрған үш науқасқа салынған еді. Донордан жүрек, өкпе және бауыр алынған.

4,8 мыңнан астам адам ағза ауыстыруды күтіп жүр

Денсаулық сақтау министрлігінің дерегінше, Қазақстанда қайтыс болғаннан кейінгі донорлық көрсеткіші 2025 жылдан бастап айтарлықтай өскен. Былтыр 18 донорлық үдеріс жүргізілген. Бұл 2024 жылмен салыстырғанда үш есе көп.

2025 жылы 68 ағза ауыстыру отасы жасалған. Салыстырсақ, 2023 жылы 19, ал 2024 жылы 23 ағза ауыстырылған.

2026 жылдың басынан бері Қазақстанда қайтыс болғаннан кейін ағзасы донорлыққа жарауы мүмкін 132 адам анықталған. Жалпы 205 ағза ауыстыру отасы жасалған.

Қазір Қазақстанда 4 867 адам ағза ауыстыру кезегінде тұр.

Бұған дейін Денсаулық сақтау министрлігі адам қайтыс болғаннан кейін оның ағзаларын донорлыққа беру жөніндегі түпкілікті шешімді марқұмның туыстары қабылдайтынын мәлімдеген.