ALGA! фестивалі Балқашта 500-ден астам оқушыны біріктірді

12 қыркүйекте Балқаш қаласындағы «Металлург» стадионында ALGA! жобасының фестивалі өтті. Іс-шараға Балқаш қаласы, Ақтоғай және Шет аудандарынан 10 мектептің 3–4 сыныптарында оқитын 500-ден астам оқушы қатысты.

Фестивальді Тимур Турлов пен Қарағанды облысының Білім басқармасының қолдауымен Қарағанды облыстық футбол қауымдастығы (QOFA) ұйымдастырды. Негізгі мақсат - балалардың футболға қызығушылығын арттырып, оларды бұқаралық спортқа тарту.

Фестиваль барысында балалар футбол бағдарламасына сай жаттығулар орындап, түрлі ойындарға қатысты. Алаңда 20 футбол станциясы мен ептілік, қимыл-қозғалыс және командалық әрекетті дамытуға арналған 12 ойын аймағы жұмыс істеді. Бағдарламада сабсоккер, Wind Ball, «Нысанаға дәл тигіз», футбол дартсы, пенальти, корнхол сияқты ойын түрлері ұсынылды.

QOFA әлеуметтік жобалар бөлімінің маманы Ғалымжан Зәдешұлының айтуынша, мұнда басты назар нәтижеге емес, балалардың футболға деген қызығушылығын оятуға бағытталған.

«Біздің басты мақсатымыз - балалардың футболға деген қызығушылығын арттырып, футболмен айналысуға деген ынтасын ояту. Сондықтан мұнда біреу жеңді, біреу жеңілді деген жоқ: барлық бала тең дәрежеде тапсырмаларды орындайды, доппен жұмыс істейді және ойнайды. Балаларға түсінікті формат арқылы біз оларды біртіндеп доппен жұмыс істеуге үйретеміз».

Фестивальге қатысушының әкесі Смахан Ержан да ұлының футболға қызығушылығы артып келе жатқанын айтты.

«Фестиваль туралы ұлымнан білдім. Ол сабақтан келген соң: “Әке, ертең футбол фестивалі болады, соған баруым керек”, - деді. Күн өткен сайын оның футболға деген қызығушылығы артып келеді, доп теуіп, “футболшы болғым келеді” дейді. Қазір жаттығып жүр. Болашақта шынымен футболды таңдаса, әрине, біз оны әрқашан қолдаймыз».

Өткен жылы фестивальге 400 бала қатысса, биыл олардың саны 500-ге жеткен. QOFA әлеуметтік жобалар бөлімінің басшысы Данияр Карибековтің сөзінше, мұндай жобалардың негізгі нәтижесі - баланың спортқа қызығушылығының оянуы.

Фестиваль соңында барлық қатысушыларға футбол формасы мен естелік сыйлықтар табысталды. ALGA! жобасы жаңа оқу жылында Қарағанды облысындағы оқушыларды футболға тарту бағытындағы жұмыстарын жалғастырады.

Нуризат Муратбекқызы