Дәрігерлер Бақытжан Базарбек қатысқан жол апатында зардап шеккен азаматтың жағдайын айтты

Бақытжан Базарбек қатысқан жол апатынан зардап шеккен Нұржігіт Қошановтың жағдайы жақсарды. Қазір дәрігерлер оның жағдайын орташа ауыр деп бағалап отыр. Бұл туралы 11 қыркүйекте Жамбыл облысының денсаулық сақтау басқармасы хабарлады.

Басқарма мәліметінше, науқастың денсаулығында оң өзгеріс бар. Оның қазіргі жағдайы бірнеше жарақаттың салдарымен байланысты. Дәрігерлер жүргізіп жатқан қарқынды ем нәтижесінде жағдайы жақсарып, қан айналымы мен жүрек жұмысы тұрақталған.

Бұрынғы Мәжіліс депутаты Бақытжан Базарбек те Нұржігіт жатқан Тараз қаласының көпбейінді ауруханасынан сурет жариялады. Ол науқасты емдеген дәрігерлерге алғыс айтып, Нұржігіттің есін жиып, аяққа тұрғанын жеткізді.

«Бұл – еліміздің мыңдаған адамы асыға күткен сурет. Суретте – өз білімі, ерекше кәсібилігі мен жанкешті еңбегінің арқасында Нұржігітті ажалдан аман алып қалып, есін жиғызып, қайтадан аяққа тұрғызған Тараз қаласының көпбейінді ауруханасының дәрігерлері», – деп жазды Базарбек.

Оның сөзінше, Нұржігіттің аяғы сынғандықтан, алда оңалту кезеңі бар.

«Біраз төккен терім ақталды, өзімнің дұғам, халықтың дұғасы Алла тағала қабыл алды. Нұржігіттің аяғы сынғандықтан, алдымызда әлі оңалтуы күтіп тұр. Сол бағытта жұмыс жасайтын боламыз», – деді ол.

Нұржігіт Қошанов 15 тамызда Жамбыл облысының Тұрар Рысқұлов ауданындағы «Батыс Еуропа – Батыс Қытай» тасжолында болған жол апатынан ауыр жарақат алған. Оны Бақытжан Базарбек қатысқан көлік қағып кеткен. Зардап шеккен азамат ауруханаға ауыр жағдайда жеткізіліп, ұзақ уақыт жансақтау бөлімінде ем қабылдады.

Бұған дейін Базарбек Нұржігіттің 24 күннен кейін есін жиып, жақындарын тани бастағанын хабарлаған еді. Жол апатына байланысты полиция қылмыстық іс қозғаған.