Трамп Зеленскийден Ресейдің мұнай өңдеу зауыттарына соққы жасауды тоқтатуды талап етті

АҚШ Президенті Дональд Трамп Украина Президенті Владимир Зеленскийді Ресейдегі дизель отынын өндіруге қатысы бар нысандарға шабуыл жасауды тоқтатуға шақырды. Оның пікірінше, мұндай соққылар әлемдік нарықта дизель тапшылығын туғызып, бағаның өсуіне ықпал етіп отыр. Бұл туралы Reuters хабарлады.

Трамп бұл мәлімдемені Ирландияда өтіп жатқан Irish Open гольф жарысы кезінде журналистерге айтты.

«Зеленский мырза бір нәрсе істеуі керек: Ресейдегі дизель өндіруге байланысты нысандарды істен шығаруды тоқтатсын. Басқа нысандарға соққы берсін, бірақ дизель отынына қатысты нысандарға тимесін. Өйткені бұл тапшылық туғызады», – деді АҚШ Президенті.

Трамп дизель тапшылығын Таяу Шығыстағы жағдайдан гөрі Ресей мен Украина арасындағы соғыспен байланыстырды. Сондай-ақ ол бұл мәселені Зеленскиймен бұған дейін талқылағанын айтты. Алайда Украина Президентінің оған қандай жауап бергенін нақтыламады.

АҚШ-та дизель бағасы күрт өсті

Соңғы уақытта әлемде бензин мен дизель отыны қымбаттап жатыр. GasBuddy мәліметінше, 10 қыркүйекте АҚШ-та дизельдің орташа бөлшек сауда бағасы алғаш рет бір галлон үшін 6 доллардан асқан. Бұл жыл басындағы көрсеткіштен 68 пайыз жоғары.

Отын бағасының күрт өсуі ақпаннан бері байқалады. Оған Таяу Шығыстағы қақтығыс, Ормуз бұғазы арқылы тасымалдың қиындауы, сондай-ақ Иран мен Ресей мұнайына қатысты шектеулер әсер етіп отырғаны айтылады.

Украина Ресейдің мұнай инфрақұрылымына шабуыл жасап келеді

Украина Ресейдің мұнай өңдеу инфрақұрылымына ұшқышсыз ұшу аппараттарымен бірнеше рет шабуыл жасады. Киев мұндай нысандарды Ресейдің әскери әлеуетін қамтамасыз ететін заңды әскери нысана деп санайды.

Украинаның өзі де Ресей тарапынан зымырандар мен ұшқышсыз ұшу аппараттарының тұрақты шабуылына ұшырап келеді.