Әлемді өзгерткен 11 қыркүйек: АҚШ-тағы терактіге 25 жыл

Бүгін, 11 қыркүйекте АҚШ-та 2001 жылы болған терактілерге 25 жыл толды. Сол күні «Әл-Каида» террорлық ұйымының 19 мүшесі төрт жолаушылар ұшағын басып алып, олардың екеуін Нью-Йорктегі Дүниежүзілік сауда орталығының қос мұнарасына, үшіншісін Пентагон ғимаратына бағыттаған. Төртінші ұшақ Пенсильванияда құлаған. Теракт салдарынан 2 977 адам қаза тапты.

Шабуыл таңғы сағат 08:46-да басталды. American Airlines әуе компаниясының 11-рейсі Дүниежүзілік сауда орталығының Солтүстік мұнарасына соғылды. Арада 17 минут өткенде, 09:03-те United Airlines компаниясының 175-рейсі Оңтүстік мұнараға соғылды.

Сағат 09:37-де үшінші ұшақ – American Airlines компаниясының 77-рейсі Вашингтон маңындағы АҚШ Қорғаныс министрлігінің ғимараты – Пентагонға соғылды. 09:59-да Нью-Йорктегі Оңтүстік мұнара құлады.

Төртінші ұшақтағы жолаушылар басқа шабуылдар туралы білген соң әуе кемесін басып алғандарға қарсы әрекет еткен. United Airlines компаниясының 93-рейсі сағат 10:03-те Пенсильвания штатындағы Шанксвилл маңындағы ашық алаңға құлады. Ал 10:28-де Дүниежүзілік сауда орталығының Солтүстік мұнарасы да құлады.

90 елдің азаматы қаза тапты

11 қыркүйектегі төрт шабуылдан барлығы 2 977 адам қаза тапқан. Оның 2 753-і Нью-Йоркте, 184-і Пентагонда, тағы 40 адам 93-рейстің бортында мерт болды. Құрбандар 90 елдің азаматы еді.

Бұл оқиға АҚШ-тың ғана емес, әлемдік саясаттың да бағытына үлкен ықпал етті. Терактілерден кейін АҚШ терроризмге қарсы жаһандық науқан бастап, Ауғанстандағы әскери операцияға кірісті. Әуежайлардағы қауіпсіздік талаптары күшейіп, халықаралық терроризммен күрес көптеген мемлекеттің қауіпсіздік саясатының негізгі бағыттарының біріне айналды.

Нью-Йоркте құрбандардың есімдері оқылады

Бүгін Нью-Йоркте 11 қыркүйек терактісінің 25 жылдығына арналған еске алу рәсімі өтеді. Дүниежүзілік сауда орталығы тұрған жердегі мемориалға құрбандардың туыстары жиналып, қаза тапқандардың есімдерін оқиды.

Биылғы рәсімде алғаш рет жеті рет үнсіздік жарияланады. Оның алтауы ұшақтардың мұнаралар мен Пентагонға соғылған, екі мұнараның құлаған және 93-рейстің апатқа ұшыраған уақыттарына сәйкес келеді. Жетінші үнсіздік 11 қыркүйек оқиғасының салдарынан кейінгі жылдары аурудан қайтыс болған құтқарушылар мен басқа адамдарды еске алуға арналады.

Кешке Нью-Йоркте дәстүрлі Tribute in Light еске алу шарасы өтеді. Манхэттен аспанына бұрынғы Егіз мұнараларды бейнелейтін екі жарық сәулесі түсіріледі. Бұл шара 11 қыркүйек терактісінен алты ай өткен соң алғаш рет ұйымдастырылған және содан бері жыл сайын өткізіліп келеді.