10 жастан бастап темір торға: Аустралияның Солтүстік аймағында қылмыстық жауапкершілік жасы төмендетілді

Аустралияның Солтүстік аймағында билік қылмыстық жауапкершілікке тарту жасын төмендету туралы шешім қабылдады. Енді 10 жастан бастап балаларды қамауға алу мүмкіндігі қайта енгізілді. Бұл туралы BBC-дің орыс қызметі хабарлады.

Бұған дейін бұл норма аймақта болған, алайда соңғы уақытта Аустралия штаттары мен территорияларына БҰҰ-ның ұсынымдарына сәйкес қылмыстық жауапкершілік жасын 10-нан 14 жасқа дейін көтеру туралы қысым жасалды. Өткен жылы Солтүстік аймақ билігі бұл жасты 10-нан 12 жасқа дейін көтерген болатын. Алайда тамыз айында билікке келген Аграрлық либералдық партия жасөспірімдер арасындағы қылмыспен күресу үшін бұл жасты қайтадан 10 жасқа дейін төмендетуді ұсынды.

Партия бұл шешім балалардың мүддесіне сай келеді деп мәлімдегенімен, көптеген дәрігер, құқық қорғаушы және жергілікті халық өкілдері онымен келіспейді. Олардың пікірінше, жаңа заң қылмыс деңгейін төмендетпейді, керісінше Аустралияның аборигендері мен Торрес бұғазы аралдарының тұрғындарына кері әсерін тигізеді.

Солтүстік аймақ елдегі басқа юрисдикциялардан 11 есе жиі балаларды қамауға алады, олардың басым бөлігі – жергілікті халықтың өкілдері. 2022-2023 жылдары Аустралияның түрмелерінде 10-17 жас аралығындағы шамамен 4,4 мың бала болған, оның ішінде Солтүстік аймақтан 273 бала сотталған.

2023 жылдың жазына қарай 10-13 жас аралығындағы 41 бала түрмеде отырса, 2019 жылы бұл көрсеткіш 52 болған. Солтүстік аймақтың жаңа билігі сайлау кезінде қылмысқа қарсы күресуге уәде бергендіктен, бұл шешімді қолдағандарын айтады.

Аймақ үкіметі қылмыстық жауапкершілікті ерте жастан енгізу балаларды болашақта қылмыс жасаудан сақтайды деп есептейді. Алайда зерттеулер көрсеткендей, түрмеге түскен жасөспірімдер қылмысты қайталауға бейім, ал түрмедегі өмір олардың денсаулығына, біліміне және болашақта жұмыс табуына кері әсер етеді.

Аустралияның Адам құқықтары жөніндегі комиссиясы да осы жылдың басында жариялаған есебінде мұндай саясаттың қатаң шараларды талап ететін популистік риторикамен байланысты екенін атап өткен болатын. Комиссияның пайымдауынша, билік ақшаны балалар түрмесіне емес, балаларды қолдау қызметіне жұмсауы керек.