Ұшақтарға бомба қойылғаны туралы хабар Еуропаны әбігерге салды: 27 рейс тоқтатылды

Еуропа елдерінің әуе кеңістігінде шұғыл жағдай орын алып, жолаушылар ұшақтары қауіпсіздік мақсатында өз бағыттарын шұғыл өзгертті. Бір күннің ішінде кемінде 27 жолаушылар рейсіне қатысты жарылғыш зат қатері туралы хабарламалар түсіп, халықаралық әуе қатынасына елеулі кедергі келтірді. Бұл – бір апта ішінде тіркеліп отырған осындай қауіп-қатерлердің екінші ірі толқыны.

Оқиғаның ушығуына байланысты Ирландияның Aer Lingus әуе компаниясына тиесілі, Дублиннен Римге бағыт алған Airbus A320 ұшағы Францияның батысындағы Эврё әскери әуе базасына мәжбүрлі түрде қондырылды. Борттағы 151 жолаушы мен 6 экипаж мүшесі қауіпсіз жерге көшіріліп, әуе кемесі жарылғыш заттарды залалсыздандыру мамандарының тексеруіне берілді.

Сонымен қатар Болгария мен Италия аспанында жағдай тіпті күрделеніп, бейбіт ұшақтарды әскери жойғыш ұшақтар сүйемелдеуге мәжбүр болды. Атап айтқанда, Копенгаген мен Мадридтен шыққан Ryanair рейстері Софияға жоспар бойынша қонса, Лондоннан ұшқан әуе кемесі Пловдивке бағытталды. Италияда да әскери ұшақтар Хельсинкиден Римдегі Фьюмичино әуежайына бара жатқан Finnair рейсін әуеде бақылауға алды.

Мадрид әуежайында 20 минутқа жетпейтін уақыт ішінде жарылыс қатері туралы бірнеше хат келіп түсіп, Iberia және Air Europa компанияларының 6 рейсіне қауіп төнді. Жолаушылар тексеріс кезінде борттан сыртқа шығарылды. Ал Варшавада LOT әуе компаниясының Парижге бағыт алған рейсі ұшу-қону жолағына бет алған сәтте тоқтатылып, жан-жақты тексеруден өткізілді.

Құқық қорғау органдары мен арнайы қызметтер барлық тексерілген ұшақтардан қауіпті заттар табылмағанын мәлімдеді. Қазіргі уақытта жаппай қатер төндірген хабарламалардың артында кімдердің тұрғанын анықтау мақсатында тергеу амалдары жүргізіліп жатыр.