АҚШ-та ата-аналар маңызды дәруменнен бас тартып, сәбилер шетінеп жатыр

АҚШ-та жаңа туған сәбилерге К витамині инъекциясын жасатудан бас тартатын ата-аналар үлесі жыл санап артып келеді. Осының салдарынан алдын алуға болатын ауыр қан кету асқынуларына ұшыраған және көз жұмған нәрестелер саны көбейген. Бұл туралы Journal of the American Medical Association (JAMA) ғылыми журналында жарияланған жаңа зерттеуде хабарланды.

Зерттеу деректеріне сәйкес, АҚШ-та К витаминін алудан бас тартқан сәбилердің үлесі 2017 жылғы 3,1 пайыз көрсеткіштен 2025 жылы 6,8 пайызға дейін өсіп, екі еседен астам артқан. Ғалымдар 5,2 миллион нәрестенің медициналық мәліметтерін талдау барысында инъекция алмаған балаларда өмірінің алғашқы 6 айында миға және асқазан-ішек жолдарына қан құйылу қаупі айтарлықтай жоғары болатынын анықтады. Сондай-ақ, бұл топтағы сәбилердің стационарда қан кету салдарынан көз жұму қаупі екі еседен астам жоғарылаған.

Филадельфия балалар ауруханасының неонатология бөлімінің зерттеушісі Кевин Дысарт бастаған мамандар бұл үрдісті соңғы жылдары қоғамда дәстүрлі медициналық шараларға қатысты өскен сенімсіздікпен байланыстырады. Кейбір ата-аналар балаға «табиғи» балама іздеп, препараттың уыттылығынан, ауырсыну тудыруынан немесе аллергиялық реакция беруінен қауіптеніп, инъекциядан бас тартады.

Нэшвиллдегі Вандербильт университетінің Монро Карелл кіші атындағы Балалар ауруханасының жаңа туған нәрестелер бөлімінің жетекшісі, доктор Анна Морадтың айтуынша, К витаминін алмаған әрбір 114 сәбидің біреуі өмірінің алғашқы алты айында ауыр қан кету асқынуына ұшырайды.

Жаңа туған сәбилердегі К витамині тапшылығынан болатын қан кетудің (VKDB) алдын алу үшін бұл инъекция медициналық стандарт ретінде алғаш рет 1961 жылы енгізілген. Витамин тапшылығы қанның ұю процесін бұзып, 20 пайыз жағдайда өлімге немесе ауыр неврологиялық салдарларға әкеледі.

АҚШ-тың Ауруларды бақылау және алдын алу орталығы (CDC) К витамині инъекциясының нәрестелер үшін толық қауіпсіз екенін растайды. Зерттеу авторлары мен медицина мамандары ата-аналар арасында ағарту жұмыстарын күшейтуге және препаратты ауызша қабылдауға арналған балама түрлерін қолжетімді етуге шақырады.