Цензура мен қатаң шектеулерге іліккен “Ауру” фильмі қанша касса жинағаны белгілі болды

Қазақстандық «Ауру» триллері отандық прокат тарихында жаңа рекорд орнатты. Фильм режисері  Айтөре Жолдасқали  өзінің инстаграм парақшасында туындының қанша қаражат жинағанын хабарлады.

«Ауру»  филимьнің табысы қазірдің өзінде 1 млрд теңгеден асты. Бұл фильм елімізде «21+» рейтингінде  осындай нәтижеге жеткен алғашқы картина болды. Алайда режиссер мен командасының айтуынша, қатаң рейтингке байланысты фильм қосымша 600–800 млн теңге көлемінде табысынан айырылған.

«Қазір прокаттың соңғы аптасы басталды. Егер сіз әлі көрмеген болсаңыз, үлгеріп қалыңыз», — деп ескертті фильм командасы.

Еске салсақ, фильмдегі кейбір қатігездік немесе зорлық сипаттағы сахналар кесілген. Режиссердің айтуынша, әсіресе финалдық сахна өзгеріске ұшырап, фильмнің соңындағы қорытындыны өзгертіп жіберген.

Заң бойынша,  «21+»  рейтингіндегі фильм тек 22:00-ден 06:00-ге дейін көрсетіледі. Дегенмен бұл «Ауруға» кинотеатрларда толық зал жинауға кедергі болмады.

Рекордтық табыстың жартысын фильм премьерадан кейінгі алғашқы демалыс күндерінде жинады: үш күндік прокатта 517 млн теңге табыс тапты. Ticketon.kz деректеріне сәйкес, 4–7 желтоқсан аралығында жинаған қаражаты 33,5 млн теңге болды, ал соңғы екі апта бойы Қазақстан прокатында «Аңдар шаhары-2» бірінші орында тұр.