АҚШ-та жұмыс визасы үшін 103 мың доллар жиынтық төлем енгізу ұсынылды

АҚШ президенті Дональд Трамптың әкімшілігі шетелдік мамандарға H-1B жұмыс визасын ресімдеу үшін 103 265 доллар көлемінде тұрақты жарна енгізуді ұсынды, деп хабарлайды Reuters.

АҚШ Ішкі қауіпсіздік министрлігі әзірлеген жобаға сәйкес, бұл жарнаны жыл сайынғы квотаға өтінім беретін жұмыс берушілер төлеуге тиіс. Ол әдетте 2000-нан 5000 долларға дейін жететін басқа да міндетті төлемдерге қосымша ретінде алынады.

Құжат әлі заңды күшіне енген жоқ. Жаңа ережелер жыл соңына дейін бекітілуі мүмкін.

H-1B бағдарламасы американдық компанияларға технология, білім беру және ғылыми зерттеулер саласындағы шетелдік мамандарды жұмысқа тартуға мүмкіндік береді. Жыл сайын бұл бағдарлама бойынша 65 мың виза беріледі, сонымен қатар АҚШ жоғары оқу орындарын магистр немесе одан да жоғары дәрежеде аяқтаған түлектер үшін қосымша 20 мың виза қарастырылған. Визалар әдетте үштен алты жылға дейінгі мерзімге ұсынылады.

Жаңа жарна қолданыстағы визаларды ұзартуға және квотаға кірмейтін өтінімдерге қатысты болмайды. Олардың қатарына университеттер, коммерциялық емес және мемлекеттік зерттеу ұйымдарының өтінімдері кіреді.

Министрлік бұл жарнадан жылына шамамен 8,8 миллиард доллар түседі деп күтуде. Қаражатты миграциялық және шекаралық қызметтердің жұмысына, көші-қон істерін қарауға және еңбек заңнамасының сақталуын бақылауға бағыттау жоспарланған.

2025 жылдың қыркүйегінде Дональд Трамп H-1B визасына өтініш білдірушілердің кейбір санаттары үшін 100 мың доллар көлемінде бөлек уақытша төлем енгізген болатын. Алайда маусым айында федералды сот бұл шешімді заңсыз деп танып, төлемді алуға тыйым салды. Президент әкімшілігі бұл шешімге шағым түсірді.

Ұсынылып отырған 103 265 доллар көлеміндегі жарна заңнамалық тұрғыдан бөлек төлем болып есептеледі және басқа нормаларға негізделген. Егер бұрынғы төлем қалпына келтіріліп, ұзартылатын болса, екі талапқа да ілігетін жұмыс берушілерге екі соманы да төлеуге тура келеді.