Ресейдегі Ozon қоймасына жасалған шабуылдан кейін компания ресми мәлімдеме жасады

24 тамызға қараған түні Краснодардағы ірі маркетплейстің логистикалық орталығына ұшқышсыз ұшатын аппараттар соққы берді. Оқиғадан кейін ғимаратта жойқын өрт басталып, нысанның жұмысы толықтай тоқтатылды. Дабыл жүйелері штаттық режимде іске қосылып, қызметкерлер шұғыл түрде қауіпсіз жерге көшірілді. Алдын ала мәліметтер бойынша, қойма қызметкерлері арасында зардап шеккендер жоқ. Оларға әлеуметтік және психологиялық қолдау көрсету үшін арнайы жедел желі іске қосылды, деп хабарлайды Ozon HQ.

Зақымданған қоймадағы тауарлар маркетплейстің витринасынан алынып тасталды. Осы орталықтан жеткізілуі тиіс болған тапсырыстар толығымен жойылып, клиенттерге қаражаттары қайтарылады. Ал басқа қоймаларда бар тауарлар кестеге сай жеткізіле береді.

Қауіпсіздік мақсатында бұл орталыққа жаңа тауар қабылдау уақытша тоқтатылды. Кәсіпкерлерге өнімді басқа логистикалық хабтарға бағыттау ұсынылды. Орталыққа баратын барлық жүк тасымал бағдарлары да қайта бөлініп жатыр.

Компания өкілдері түнде Краснодарда бейбіт тұрғындардың, оның ішінде балалардың қаза табуы мен зардап шегуіне байланысты марқұмдардың отбасыларына қайғырып көңіл айтты.

Қазіргі уақытта оқиға орнында төтенше жағдайлар қызметі жұмыс істеп жатыр. Компания барлық өзекті ақпаратты өзінің ресми Telegram және Max арналарында үздіксіз жаңартып отыр.