Қазақстанда Құрылтай сайлауында дауыс беру аяқталды

Қазақстанда Құрылтай депутаттарын сайлауда дауыс беру аяқталды. Ел аумағындағы сайлау учаскелері сағат 20:00-де жабылып, комиссиялар дауыс санауға кірісті.

23 тамызда ел бойынша 10 363 сайлау учаскесі жұмыс істеді. Сайлаушылар тізіміне дауыс беру құқығы бар 12 605 788 адам енгізілген.

Қазақстан аумағында дауыс беру аяқталғанымен, шетелдегі сайлау учаскелерінің бір бөлігінде сайлау жалғасып жатыр. Шетелдегі азаматтар Қазақстанның дипломатиялық өкілдіктері жанындағы учаскелерде жергілікті уақыт бойынша дауыс береді.

Сағат 19:00-дегі жағдай бойынша Қазақстанның 61 елдегі шетелдік мекемелері жанынан ашылған 79 сайлау учаскесінің барлығы жұмысын бастаған. Ең соңғы болып АҚШ-тың Сан-Франциско қаласындағы учаске ашылды.

Сыртқы істер министрінің орынбасары Арман Исетовтің мәліметінше, 11 елде дауыс беру аяқталған. Бұл елдердегі тізімге енгізілген 11 402 сайлаушының 6007-сі дауыс берген.

Елдегі сайлау комиссиялары дауыс санауға кірісті. Орталық сайлау комиссиясының тәртібіне сәйкес, дауыс санау 12 сағаттан аспауға тиіс.

Сайлау учаскелерінен шыққан азаматтар арасында жүргізілген сауалнама нәтижелері дәстүрлі түрде дүйсенбіге қараған түні жарияланады. Ал сайлаудың алғашқы ресми нәтижелері 24 тамыз күні таңертең белгілі болады деп күтіледі.