УЕФА бастаған үш конфедерация Инфантиноны қызметтен кетіруді талқылап жатыр

Еуропалық футбол қауымдастықтарының одағы (УЕФА) және бірнеше құрлықтық футбол конфедерациясы ФИФА президенті Джанни Инфантиноға сенімсіздік білдіру мүмкіндігін талқылап жатыр. Бұл туралы Reuters дереккөздеріне сүйеніп хабарлады.

Агенттік мәліметінше, УЕФА-мен бірге Солтүстік және Орталық Америка мен Кариб аймағы футбол конфедерациясы (CONCACAF) және Азия футбол конфедерациясы (AFC) да бұл мәселені қарастырып жатыр.

Бұған Инфантиноның халықаралық футбол жарыстарын ішінара жекеменшікке беру жоспарына байланысты туған дау себеп болған. Кейін ФИФА бұл жоспардан бас тартты.

Бұған дейін The Telegraph УЕФА-ға мүше 55 елдің бәрі Инфантиноның қызметтен кетуін талап етуді қолдауға дайын екенін жазған.

Алайда ФИФА жарғысында ұйым президентіне сенімсіздік білдіру тәртібі қарастырылмаған. Reuters мәліметінше, ФИФА-ға мүше 211 ұлттық қауымдастықтың кемінде бестен бірі талап етсе, ұйым кезектен тыс конгресс шақыруға міндетті. Сол жиында Инфантиноның қызметтен кетуі туралы мәселе көтерілуі мүмкін.

Дегенмен мұндай қадамды қолдайтындардың арасында да күмән бар. Агенттік дереккөздерінің айтуынша, Инфантиноны қызметтен кетіру әрекеті сәтсіз аяқталса, бұл оның 2027 жылғы ФИФА президенті сайлауы алдындағы орнын керісінше нығайтуы мүмкін.

Даудың төркіні – Инфантиноның футболдан әлем чемпионаты мен басқа да халықаралық жарыстардағы үлесті жеке инвесторларға беру жоспары. БАҚ мәліметінше, ықтимал инвесторлардың арасында АҚШ президенті Дональд Трамптың күйеу баласы Джаред Кушнердің туыстарымен байланысты тараптар да болған.

Инфантино бұл қадам футбол қауымдастықтарының табысын төрт есе арттыруға мүмкіндік береді деп мәлімдеген. Алайда бастама қатаң сынға ұшырап, ФИФА одан бас тартты.

Джанни Инфантино ФИФА-ны 2016 жылдан бері басқарады. Келесі президент сайлауы 2027 жылғы наурызда өтеді.