23 тамыз – сайлау күні: Алматыда түрлі сала өкілдері азаматтарды дауыс беруге үндеді

Алматыда қоғамның түрлі сала өкілдері қала тұрғындарын азаматтық белсенділік танытып, 23 тамызда өтетін Құрылтай депутаттарының сайлауына қатысуға шақырды. Аталған үндеуге зиялы қауым өкілдері, ардагерлер, ғалымдар, мәдениет және өнер қайраткерлері, спортшылар, кәсіпкерлер, қоғам белсенділері, өндіріс пен қызмет көрсету саласының мамандары, сондай-ақ жастар мен блогерлер белсене қосылды.

Мамандардың пікірінше, сайлауға қатысу – әрбір азаматтың елдің қоғамдық-саяси өміріне деген жоғары жауапкершілігін білдіретін маңызды қадам.

Алматы қаласының Ардагерлер қауымдастығы да бұл бастаманы толық қолдады. Қалалық Ардагерлер кеңесінің кеңейтілген отырысында алдағы сайлауға қатысу мәселелері талқыланып, түсіндіру жұмыстарын жүргізу мақсатында арнайы штаб құрылды.

Этномәдени бірлестіктердің өкілдері де арнайы үндеу жолдап, сайлауға қатысуды ел бірлігі мен ортақ болашақ алдындағы жауапкершіліктің айқын көрінісі ретінде бағалады. Олар Қазақстандағы этносаралық келісім мен өзара құрмет құндылықтарына тоқталып, әрбір азаматтың жауапты ұстанымы қоғамдық тұрақтылық пен бірлікті нығайтуға ықпал ететінін атап өтті.

Ғылыми-сарапшылық қауымдастық та ортақ үндеуге үн қосты. Философия, саясаттану және дінтану институтының сараптамалық алаңында Құрылтай сайлауының қоғамдық-саяси маңызы, саяси жүйені жетілдірудегі және қоғамдық диалогты дамытудағы рөлі сарапқа салынды.

Алматы қаласының Қоғамдық кеңесі арнайы отырыс өткізіп, азаматтық белсенділікті арттырудың маңызына назар аударды. Кеңес мүшелері дауыс беру процесі ел болашағына бейжай қарамайтын белсенді азаматтық ұстанымның көрінісі екенін жеткізді.

Үндеуге спорт қауымдастығының өкілдері мен альпинистер де қосылып, алматылықтарды 23 тамыз күні сайлау учаскелеріне барып, өз таңдауын жасауға шақырды.

Бизнес қауымдастығы, соның ішінде құрылыс, қонақ үй, көлік, консалтинг салаларының өкілдері, сондай-ақ «Яндекс Такси» мен BI Group сияқты ірі компаниялардың ұжымдары да азаматтық жауапкершіліктің маңызын атап өтті. «Қазлегпром-Алматы», «Асфальтобетон 1», «Алматы нан» және Angelcher өндірістік кәсіпорындарының еңбек ұжымдары елдің тұрақты дамуы мен балалардың болашағы азаматтық белсенділікпен тікелей байланысты екенін білдірді.

Бастаманы қызмет көрсету, сауда саласының мамандары, қоғамдық көлік жүргізушілері, курьерлер мен 200-ден астам мопед жүргізушісі де қолдады. Жастар мен блогерлер азаматтарды сайлауға қатысуға шақыратын арнайы бейнероликтер дайындап, өз үлестерін қосты.

Өнер, спорт, ғылым, бизнес, өндіріс және басқа да салалардың өкілдерін біріктірген ортақ мақсат – ел болашағын айқындауға белсене қатысу. Барша алматылықтар 23 тамызда өтетін Құрылтай депутаттарының сайлауында дауыс беруге шақырылады.