Қазақстандықтардың үштен бірінен астамы жазда демалмаған

Жұмыс істейтін қазақстандықтардың 35 пайызы биыл жазда іс жүзінде демалмаған. Бұл туралы 820-дан астам жұмыс іздеуші мен жұмыс беруші қатысқан Headhunter.kz зерттеуінде айтылған.

Сауалнамаға қатысқандардың 25 пайызы жазда жақсы демалғанын, тағы 17 пайызы демалысына біршама көңілі толатынын айтқан. 14 пайызы жеткілікті демала алмаған, ал 9 пайызының негізгі демалысы әлі алда.

Биыл жазда респонденттердің жартысының жұмыс жүктемесі артқан. 25 пайызы әдеттегіден әлдеқайда көп, тағы 25 пайызы біршама көбірек жұмыс істеген. 24 пайызында жұмыс көлемі айтарлықтай өзгермеген.

Сауалнамаға қатысқандардың 21 пайызы демалыс немесе демалыс күндері де тұрақты түрде жұмыс істеуге мәжбүр болған. Ал жұмыс мәселелерінен толықтай алшақтай алғандар – 18 пайыз. Тағы 14 пайызы жұмысқа қатысты хабарламалар мен қоңырауларға анда-санда жауап берген немесе ерекше жағдайда ғана жұмыс істеген.

Жаздан кейін респонденттердің төрттен бірінің жұмысқа деген көзқарасы өзгермеген. Ал 21 пайызы жұмыс орнын ауыстыруға шешім қабылдаған, 18 пайызы бұл туралы ойланып жүр. 12 пайызы еңбек жағдайын өзгерткісі келсе, 7 пайызы қазіргі жұмыс орнын бұрынғыдан көбірек бағалай бастаған.

Жаз қорытындысында сауалнамаға қатысқандардың 23 пайызы өмірінде өзгеріс пен жаңа әсер болғанын қалайды. 18 пайызы әлі де шаршағанын сезінеді, оның ішінде 10 пайызы шаршауын жұмыспен байланыстырады. Толық демалып, күш жинағанын айтқандар небәрі 9 пайыз.

Күзде респонденттердің 55 пайызы табысын арттырғысы келеді. 36 пайызы жаңа жұмыс іздеуді, 25 пайызы жаңа дағды немесе мамандық меңгеруді жоспарлап отыр. 16 пайызы икемді жұмыс кестесін қаласа, 15 пайызы аз жұмыс істеп, көбірек демалғысы келеді.