Қазақстанда инфляция 2028 жылдан бастап 6–8 пайызға дейін төмендеуі мүмкін

Қазақстан үкіметі 2027 жылы инфляцияны 7,5–9,5 пайыз аралығында ұстап тұруды жоспарлап отыр. Ал 2028–2029 жылдары инфляция дәлізі 6–8 пайыз деңгейінде болжанып отыр. Бұл туралы 2027–2029 жылдарға арналған әлеуметтік-экономикалық даму болжамын талқылау кезінде айтылды.

Үкімет болжамына сәйкес, елдің атаулы жалпы ішкі өнімі 2027 жылғы 199,3 трлн теңгеден 2029 жылы 245 трлн теңгеге дейін өседі.

«Экономикалық өсім мұнайға қатысы жоқ салалардағы өндірістің ұлғаюы есебінен қамтамасыз етіледі. Өңдеу өнеркәсібінің өсу қарқыны тау-кен өнеркәсібіндегі өсімнен жоғары болады», – деді Ұлттық экономика министрі Серік Жұманғарин.

Ұлттық экономика министрлігінің есебінше, республикалық бюджет кірісі 2027 жылы 19,9 трлн теңге, ал 2029 жылы 23,4 трлн теңге болады.

Салыстыру үшін, 2025 жылы жасалған болжамда 2026 жылғы республикалық бюджет кірісін 19,2 трлн теңге деңгейінде қалыптастыру жоспарланған.