Тоқаев халықаралық олимпиада жүлдегерлеріне 1500 АЕК-ке дейін сыйақы табыстады

Президент Қасым-Жомарт Тоқаев Ақордада халықаралық пән олимпиадаларының жеңімпаздары және жүлдегерлерімен кездесіп, оларға ақшалай сыйақы сертификаттарын табыстады, деп хабарлады Ақорда.

Кездесуге физика, химия, биология, математика, информатика, география және лингвистика пәндері бойынша халықаралық білім сайыстарында жүлде алған 21 оқушы мен студент, сондай-ақ олардың ұстаздары мен тәлімгерлері қатысты. Олардың алтауы алтын, он бірі күміс, төртеуі қола медаль иеленген.

Алтын медаль иегерлеріне 1500 АЕК, күміс медаль алғандарға 1000 АЕК, қола жүлдегерлерге 500 АЕК көлемінде ақшалай сыйақы сертификаттары табысталды.

«Әрқайсыңыз әлемнің ең зияткер оқушыларымен бәсекеге түсіп, беделді білім додаларында топ жардыңыздар. Көк Туымызды биікке көтеріп, еліміздің абырой-беделін арттыруға мол үлес қосып жүрсіздер. Біз сіздерді мақтан тұтамыз. Қазақстанның жарқын болашағы – ойы ұшқыр, білімді, дарынды жастардың қолында», – деді Президент.

Тоқаевтың айтуынша, биыл қазақстандық оқушылар 44 халықаралық олимпиада мен ғылыми сайысқа қатысып, мыңнан астам медаль жеңіп алған. Оның 200-ден астамы – алтын медаль.

Президент халықаралық физика олимпиадасындағы нәтижені ерекше атап өтті. Қазақстан атынан қатысқан бес оқушының бесеуі де алтын медаль иеленген. Мемлекет басшысы мұны бұрын-соңды болмаған көрсеткіш деп бағалады.

Кездесуде Тоқаев бір күн бұрын өткен Құрылтай сайлауына да тоқталды.

«Кеше ғана тарихымызда тұңғыш рет Құрылтай сайлауы өтті. Бұл сайлау сәтті, мінсіз ұйымдастырылды деп айтсақ, қате болмас. Осы мүмкіндікті пайдаланып, бүкіл халқымызға азаматтық кемелдік танытып, жаңару стратегиямызды қолдағаны үшін мың да бір алғысымды айтамын», – деді Президент.

Олимпиада жүлдегерлерін дайындаған ұстаздар мен тәлімгерлер де мемлекеттік наградалармен марапатталды. Мейрамгүл Кенжеханова мен Ирина Нестеренкоға «Құрмет» ордені, Жанболат Жолгелдиев, Қарлығаш Жолдыбаева, Владимир Жук және Айгүл Сейітдәулетке «Ерен еңбегі үшін» медалі берілді. Батыр Жарқын, Меруерт Абаева, Олжас Әмзеев және Бақыт Мамышев «Шапағат» медалімен марапатталды.