Тоқаев сыйлаған сағат 2,9 млн теңгеге сатылымға қойылды

Тазы өсіруші Анна Захарова президент Қасым-Жомарт Тоқаевтың өзіне сыйлаған сағатын 2 млн 899 мың теңгеге сатылымға қойды. Бұл туралы ол Threads парақшасында жазды.

Захарова 2023 жылы Наурыз мерекесі кезінде Мемлекет басшысымен кездесіп, оған бір жарым айлық тазы күшігін сыйлаған. Президент оған өз қолтаңбасы қойылған сағат тарту еткен.

Арада үш жыл өткен соң Захарова президенттен алған сыйлығын сатуға шешім қабылдаған. Оның айтуынша, сағаттың өзі үшін естелік әрі мәртебелі мәні бар, алайда оны тағып жүрмейді. Сатып алушыға сағатпен бірге тиісті құжаттары да беріледі.

Сағаттың бағасы 2 млн 899 мың теңге деп көрсетілген, саудаласуға болады. Иесі бұл бұйым коллекционерлерді қызықтыруы мүмкін деп есептейді.

Захарованың болжамынша, уақыт өте келе президенттің қолтаңбасы бар сағаттың құны өсуі ықтимал. Ол тіпті он жылдан кейін оның бағасы 30 млн теңгеге дейін жетуі мүмкін деп топшылаған.