Мемлекеттік органдардың әрекетсіздігінен бюджетке 30 млрд теңге түспеген

Қазақстанда мемлекеттік органдардың тиісті талап қою шараларын қабылдамауы салдарынан қылмыстық істер бойынша мемлекетке келтірілген 30,1 млрд теңге залал өндірілмей қалған. Бұл туралы Бас прокуратура хабарлады.

Ведомство соңғы екі жылда соттар қараған қылмыстық істер бойынша мемлекетке келтірілген залалдың жалпы көлемі 66,5 млрд теңге болғанын мәлімдеді. Соның 30,1 млрд теңгесі мемлекет пайдасына өндірілмеген.

«Қалыптасқан жағдайдың негізгі себептерінің бірі – уәкілетті мемлекеттік органдардың мемлекетке келтірілген залалды өндіру туралы талап қоймауы. Прокурорлар алты ұсыну, үш наразылық енгізіп, жалпы сомасы 30,1 млрд теңге болатын 27 талап қойды», – делінген хабарламада.

Қабылданған шаралардың нәтижесінде мемлекетке 651 млн теңге қайтарылған. Қалған залалды өндіру жөніндегі талаптарды соттар қарап жатыр.

Бас прокуратура Қызылорда облысындағы істі мысалға келтірді. Екі азамат 63 автокөліктің құжаттарына жалған мәлімет енгізіп, соның салдарынан бюджетке 575,9 млн теңге түспеген.

Прокуратура араласқаннан кейін уәкілетті орган сотқа жүгінген. Сот 575,9 млн теңгені мемлекет пайдасына өндіріп алу туралы шешім шығарған.