Тоқаев келесі президент сайлауына қатыса ма? Президент жауап берді

Президент Қасым-Жомарт Тоқаев келесі президент сайлауына қатысу-қатыспағаны туралы айтуға әлі ерте екенін мәлімдеді. Ол бұл мәселеге 2027 жылы нақтырақ жауап беруі мүмкін екенін «Власть» журналисіне сайлау учаскесіндегі брифинг барысында айтты.

Тоқаев бұған дейін Конституциялық сот жаңа Конституция қабылданғаннан кейін президенттің бұл қызметке қайта сайлануына құқығы бар және ол бірінші мерзім болып есептеледі деген шешім шығарғанын еске салды. Мемлекет басшысы бұл шешімнің заңды екенін атап өтті.

«Заң бойынша қайта сайлануға құқығым бар. Бірақ алдағы сайлауға қатысты, өзіңіз айтқандай, сайлауға түсемін бе, түспеймін бе, қай жылы болады деген мәселені қазір талқылау ерте. Өйткені еліміздің алдында тұрған өте көп міндетті орындауымыз керек», – деді Тоқаев.

Президенттің айтуынша, алдағы міндеттердің бірі – Қазақстанда ауқымды құрылыс жүргізіп, ең алдымен халыққа қажетті әлеуметтік нысандар салу. Бұл мақсатқа Ұлттық қор қаражатын да пайдалану қажет деп есептейді.

«Ақшаны шетелдегі бағалы қағаздарда не үшін ұстаймыз? Оны халықтың игілігіне пайдалануға болады. Бұл ақшаны қозғамай ұстап отыруға қарсымын. Ол халқымызға қызмет етуі керек», – деді Президент.

Тоқаев әлемдегі жағдайдың күрделі екенін де атап өтті. Соған қарамастан, оның айтуынша, Қазақстан ел ішіндегі тұрақтылықты сақтап, экономикалық өсімді қамтамасыз ете алған.

Ал жаңа президенттік мерзімге сайлауға түсу мүмкіндігіне қатысты Тоқаев: «Келесі жылы нақтырақ жауап беруім мүмкін», – деді.

7 шілдеде Конституциялық сот жоғары лауазымды тұлғалар, соның ішінде президент жаңа Конституция қабылданғаннан кейін өз қызметіне қайта сайланса, бұл олардың бірінші мерзімі болып есептелетінін түсіндірген.

Қасым-Жомарт Тоқаев алғаш рет 2019 жылғы маусымда президент болып сайланды. 2022 жылғы қарашада ол кезектен тыс президент сайлауында қайта жеңіске жетті. Қазіргі президенттік өкілеттік мерзімі 2029 жылы аяқталуға тиіс.