Экзитпол: «Әділет» партиясы 70 пайыздан астам дауыс жинады

Қазақстанда Құрылтай депутаттарын сайлау қорытындысы бойынша үш экзитполдың нәтижесі жарияланды. Үшеуінде де «Әділет» партиясы 70 пайыздан астам дауыс жинап, бірінші орынға шықты.

«СОЦИС-А» кешенді әлеуметтік зерттеулер институтының сауалнамасы бойынша:

• «Әділетке» респонденттердің 70,7%-ы дауыс берген;
• «Ауыл» – 6,4%;
• Respublica – 5,5%;
• «Ақ жол» – 5,4%;
• ЖСДП – 5%;
• Қазақстан халық партиясы – 3,2%;
• «Байтақ» – 1,2%;
• «Бәріне қарсымын» деген жауапты 2,6% респондент таңдаған.

Қоғамдық саясат институтының экзитполында

• «Әділет» партиясының көрсеткіші 72,3% болды;
• «Ауыл» – 6,2%;
• Respublica – 5,2%;
• «Ақ жол» – 5,1%;
• ЖСДП – 5%;
• Қазақстан халық партиясы – 2,8%;
• «Байтақ» – 0,9%;
• «Бәріне қарсымын» – 2,5%.

Еуразиялық интеграция институтының зерттеуінде:

• «Әділетке» 71,8% дауыс берілген;
• «Ауыл» – 6,4%;
• Respublica – 5,4%;
• ЖСДП – 5,2%;
• «Ақ жол» – 5,1%;
• Қазақстан халық партиясы – 3%;
• «Байтақ» – 1%;
• Респонденттердің 2,1%-ы «Бәріне қарсымын» деген жауапты таңдаған.

Осылайша, үш экзитполдың нәтижесі бойынша «Әділет», «Ауыл», Respublica, «Ақ жол» және ЖСДП 5 пайыздық межеге жетіп отыр. Қазақстан халық партиясы мен «Байтақ» бұл межеден төмен нәтиже көрсетті. Дегенмен бұл – сауалнама нәтижелері, сайлаудың ресми қорытындысы емес.

Партиялардың Құрылтайға өтуі үшін кемінде 5 пайыз дауыс жинауы қажет.

23 тамызда Қазақстанда бір палаталы Құрылтай депутаттарын сайлау өтті. Орталық сайлау комиссиясының алдын ала мәліметі бойынша, сағат 20:00-ге дейін 9 352 151 адам немесе сайлаушылардың 74,19%-ы бюллетень алған.

Ең жоғары қатысу көрсеткіші Түркістан облысында – 92,16%, Жетісу облысында – 91,19% және Қызылорда облысында – 90,75%. Ең төмен көрсеткіш Алматыда тіркелді – 43,23%. Астанада сайлаушылардың 51,67%-ы дауыс берген.

Сайлаудың алдын ала ресми нәтижелері дауыс беруден кейінгі күні жарияланады деп күтіледі. Ал түпкілікті қорытындыны Орталық сайлау комиссиясы заң бойынша дауыс беру күнінен кейін он күн ішінде анықтайды.