«Росатом» Қазақстандағы АЭС салынатын жерде зерттеу жұмыстары аяқталуға жақын екенін мәлімдеді

Ресейдің «Росатом» мемлекеттік корпорациясы Қазақстандағы алғашқы атом электр станциясы салынатын алаңда жүргізілген зерттеу жұмыстары іс жүзінде аяқталғанын мәлімдеді. Бұл туралы корпорацияның бас директоры Алексей Лихачев Ресей президенті Владимир Путинге атом энергетикасын дамыту мәселелері жөніндегі жиында айтты.

Сөз Алматы облысындағы Балқаш көлінің жағасында, Үлкен ауылы маңында салынатын АЭС туралы болып отыр.

«Біз ВВЭР-1200 үлгісіндегі екі энергоблок орналасатын алаңдағы зерттеу жұмыстарын іс жүзінде аяқтадық», – деді Лихачев.

Бұған дейін Қазақстанның Атом энергиясы жөніндегі агенттігі АЭС салынатын жердегі зерттеу жұмыстарын 2026 жылдың соңына немесе 2027 жылдың басына қарай толық аяқтау жоспарланғанын хабарлаған. Бұл жұмыстар құрылыс басталғанға дейін аумақтың табиғи жағдайын, топырағы мен климатын зерттеуді қамтиды.

Үлкен ауылы маңындағы АЭС іргетасын құю 2029 жылға жоспарланған.

Қазақстанда екінші және үшінші атом электр станциясын салу Қытайдың CNNC компаниясына тапсырылған. Алайда бұл екі станцияның нақты қай жерде салынатыны әзірге бекітілген жоқ.