Елімізде қатерлі ісікті ерте анықтау көрсеткіші айтарлықтай артты

Қазақстанда онкологиялық аурулармен күресте түбегейлі өзгерістер орын алуда. Кешенді жоспар аясында атқарылып жатқан ауқымды жұмыстардың арқасында елімізде ісікті ерте анықтау мен оны заманауи әдістермен емдеу сапасы бұрын-соңды болмаған деңгейге көтерілді, деп хабарлайды Қазақстан Республикасы Денсаулық сақтау министрлігінің баспасөз қызметі.

Дәлдігі жоғары диагностиканың арқасында қатерлі дертті бастапқы кезеңде құрықтау мүмкіндігі едәуір артты. 2026 жылдың алғашқы алты айында 17,4 мың ПЭТ/КТ зерттеуі жасалып, бұл көрсеткіш өткен жылмен салыстырғанда 21,6%-ға өсті. Сонымен қатар халықты онкоскринингтермен қамту деңгейі 41,7%-ға дейін ұлғайды.

Емдеудің ең озық тәсілдері енді өз елімізде қолжетімді. Ұлттық ғылыми онкология орталығының жаңа корпусы ашылғаннан кейін, Қазақстан тарихында алғаш рет протондық терапия қолданысқа енгізілді. Ағымдағы жылдың бірінші жартыжылдығында 3,8 мыңнан астам протондық терапия емшарасы мен 9 мыңнан астам сәулелік терапия сеансы сәтті жүргізілді. Жалпы, заманауи сәулелік еммен қамту көрсеткіші 65%-ға жетті.

Ісіктің табиғатын дөп басып анықтайтын иммуногистохимиялық зерттеулердің де көлемі екі есеге жуық артып, 65,1 мыңға жеткен. Өңірлердегі медициналық ұйымдарды заманауи инфрақұрылыммен жарақтандыру үшін 27 млрд теңгеден астам қаражат жұмсалды.

Жыл соңына дейін Қарағанды облысында жаңа ПЭТ/КТ орталығын ашу және дәлдігі жоғары алғашқы референс-орталықтарды іске қосу жоспарланған. Басты мақсат - азаматтардың тұрғылықты жеріне қарамастан, уақыт созбай, сапалы әрі жоғары технологиялық медициналық көмек алуын қамтамасыз ету.